Самарқанд шаҳрида бўлиб ўтган иқтисодий форумда «Ўзбекнефтгаз» АЖ Бошқаруви раиси Меҳриддин Абдуллаев ва SOCAR компанияси мице-президенти Рафига Гусейзода томонидан имзоланган Меморандум ҳамда ушбу компаниялар ўртасидаги нефть-газ соҳасида ҳамкорликни кенгайтириш йўналишида 2022 йил 5 июлда ишлаб чиқилган «Йўл харитаси»га асосан HR департаментининг Ходимларни баҳолаш ва рағбатлантириш йўналишида фаолият олиб борувчи ходимлар Озарбайжонда хизмат сафарида бўлишди.
Ташриф доирасида SOCAR давлат нефть компаниясидаги ходимларнинг самарадорлигини баҳолаш ва уларни рағбатлантириш тизими батафсил ўрганиб чиқилди.
Танишув асносида компания мутахассислари томонидан самарадорликни баҳолаш (KPI) тизимини жорий этиш босқичлари, аниқланган стратегик мақсад ва вазифалар, мақсадлар устуворлигини белгилаш, стратегик мақсадларни таркибий бўлинма даражасига поғоналаш, ходимларга самарадорлик кўрсаткичларини белгилаш ҳамда корпоратив миқёсида йўлга қўйилган баҳолаш жараёнлари тўғрисида батафсил маълумот берилди.
Делегация аъзолари, SOCAR давлат нефть компаниясининг бош офиси, таркибий бўлинмалари ҳисобланган «Азнефть» АЖнинг «Bibi-eybat» кони, Боку олий нефть мактаби, Қобустон регионал таълим марказида бўлишди.
Шу билан бирга «Ўзбекнефтгаз» АЖ мутахасислари томонидан компанияда бу йўналишда амалга оширилаётган жараёнлар тўғрисида фикр мулоҳазалар билдирилиб, ҳамкасблар ўртасида тажриба алмашунивига эришилди.
Ташриф якунида SOCAR давлат компанияси тегишли таркибий бўлинмалар раҳбарлари билан расмий учрашув бўлиб ўтди. Бунда «Ўзбекнефтгаз» компаниясида KPI тизимини жорий этишда амалга оширилаётган жараёнлар тўғрисида тақдимот қилинди. Келгусида компаниялар мутахасислари ўртасида самарадорликни бошқариш, самарадорликни баҳолаш йўналишларида амалга ошириладиган ишлар тўғрисида режалар муҳокама қилинди.
SOCAR компанияда бўлиб, у ерда тажриба алмашиб қайтган мутахассислар ушбу хорижий компанияда орттирган ўз билим ва кўникмаларини Жамиятда фаолият юритаётган ҳамкасблари билан ўртоқлашишди. Ўзаро мулоқот ва давра суҳбатлари, семинарлар ташкил этилиб компаниядаги фаолият борасида тушунчалар берилди.
Таъкидлаш жоизки, «Ўзбекнефтгаз» АЖ томонидан самарадорликнинг муҳим кўрсаткичлари тизими (KPI) жорий қилишнинг навбатдаги босқичи амалга ошириш ишлари бошланган бўлиб, ҳозирда ушбу тажриба ва кўникмаларни жамиятда жорий этиш орқали компания менежерлари ҳамда ходимлари билан лойиҳани якунига етказишга бел боғланган.
Эслатиб ўтамиз, «Ишлаб чиқариш жараёнларининг самарадорлигини ошириш тизимидаги ёндашувларни ўрганиш» йўналиши доирасида «Ўзбекнефтгаз» АЖнинг бир гуруҳ мутахассислари Гейдар Алиев номидаги нефтни қайта ишлаш заводига ташриф буюришган эди.
«Ўзбекнефтгаз» АЖ ьатбуот хизмати
Изоҳ (0)