Ўзбекистонда ҳафта давомида ҳарорат кўтарилиши кутилмоқда

«Ўзгидромет» ҳафта давомида қандай об-ҳаво бўлишини маълум қилди.

Марказ маълумотига кўра, 21 ноябрь, душанба куни  Ўзбекистон бўйича кам булутли ва қуруқ об-ҳаво бўлади. Фақат Навоий вилоятининг шимолий ҳудудларида, шунингдек, Тошкент вилоятининг баъзи жойларида фронтал булутли чизиқлар ўтишида бироз ёмғир ёғиши мумкин, тоғли ҳудудларда ёғингарчилик (ёмғир, қор) бўлади.

Кундузи ҳаво ҳарорати 13-15 даража илиқ, жанубда 18-21 даража илиқ атрофида бўлади.

Сешанба кунидан бошлаб ва иш ҳафтасининг охиригача Ўзбекистон ҳудудига Эрон ҳудудларидан қуруқ ва жуда илиқ ҳаво кириб келиши кутилмоқда. Ҳарорат фони 6-8 даражага кўтарилади. Кундузи ҳаво ҳарорати сешанба куни 15-17 даражагача, сўнг эса 18-20 даражагача, баъзи жойларда 23 даражагача кўтарилади.

Республика бўйича ёғингарчилик кутилмайди, фақат Тошкент вилоятининг айрим жойларида сешанбага ўтар кечаси бироз ёмғир ёғиши мумкин, тоғларда ёғингарчилик бўлади.

21—22 ноябрда республиканинг тоғли ҳудудларида қор кўчиши хавфи бор. Шу кунларда республиканинг айрим жойларида шамол 15-20 метр/секундгача кучайиши кутилмоқда.

Республика бўйича баъзи жойларга туман тушиши мумкин.