Европа тикланиш ва тараққиёт банки (EТТБ) Ўзбекистон билан ҳамкорликни янада чуқурлаштириш ниятида. Бу ҳақда Инвестициялар ва ташқи савдо вазирлиги матбуот хизмати хабар берди.
Маълум қилинишича, 15 ноябрь куни бош вазир ўринбосари — инвестициялар ва ташқи савдо вазири Жамшид Хўжаев EТТБнинг Марказий Осиё бўйича бошқарувчи директори Жужанна Харгитай ва банкнинг Ўзбекистондаги ваколатхонаси раҳбари Алкис Дракиносни қабул қилди.
Учрашув давомида банк вакиллари Ўзбекистондаги ижтимоий-иқтисодий ўзгаришларнинг самарадорлигини юқори баҳолаб, энергетика, инфратузилмани ривожлантириш, ирригация ва бошқа соҳалардаги модернизация жараёнларини молиявий ва техник қўллаб-қувватлашни давом эттириш ниятини билдирди.
EТТБ уй-жой коммунал хўжалиги, энергетика ва сув таъминотини яхшилашга қаратилган ислоҳотларни амалга оширишда кенг иштирок этатётгини ҳам мамнуният билан таъкидланди. 2018 йилдан ҳозирги кунга қадар EТТБ ушбу соҳаларни қўллаб-қувватлаш учун Ўзбекистонда 14 та лойиҳа бўйича битимларни имзолади. Бундан ташқари, банкнинг янги инвестиция портфели қиймати 724 миллион доллардан ошадиган 7 лойиҳадан иборат.
Келгуси тадбирларни юқори ташкилий даражада ва мазмун жиҳатидан бойитилган тарзда тайёрлаш ва ўтказиш доирасида ушбу мақсадда ташкил этилган ишчи гуруҳлар ўртасидаги ўзаро ҳамкорликни фаоллаштиришга келишилди.
Суҳбат давомида Банкнинг «Андижон, Наманган ва Фарғона вилоятларидаги 118 та насос станцияларини модернизация қилиш» лойиҳасини молиялаштириш, қиймати 200 миллион доллар бўлган Ўзбекистоннинг ирригация секторининг институционал тузилишини мустаҳкамлаш бўйича ислоҳотларни амалга оширишга қизиқиши билдирилди. Ушбу лойиҳани биргаликда амалга ошириш бўйича ўзаро англашув меморандумини имзолаш тўғрисида келишувга эришилди.
Учрашув якунида томонлар жорий лойиҳаларни сифатли амалга ошириш ва стратегик шерикликнинг янги йўналишларини ишлаб чиқиш доирасида ҳамкорликни янада чуқурлаштиришга содиқлигини билдирди.
Мавзуга доир:
Изоҳ (0)