Ижтимоий тармоқларда Энергетика вазирлиги ҳузуридаги «Миллий диспетчерлик маркази» ДУК директори Музаффар Бобоевнинг ҳудудий электр тармоқлари корхоналари раҳбарлари, «Ҳудудий электр тармоқлари» компанияси бошқарув раиси, Энергетика вазирлиги ҳамда «Ўзэнергоинспекция»га юборган блекаутдан огоҳлантириш хати тарқалди. «Gazeta.uz» хабарида келтирилишича, Энергетика вазирлиги матбуот хизмати ушбу хатнинг ҳақиқийлигини тасдиқлаган.
Хатда ёзилишича, 2022 йил 9 ноябрдан бошлаб энергетика тизими иссиқлик электр станциялари (ИЭС) ёқилғи таъминоти билан боғлиқ оғир ҳолат вужудга келган. 12 ноябрь куни электр станцияларга келишилган жадвалга нисбатан жами соатига 350 минг метр куб, шу жумладан, Тошкент ИЭСга режадан соатига 270 минг метр куб кам газ етказиб берилган. Тошкент ИЭСга 50 минг метр куб табиий газ етказилиб, станцияда энергоблоклар технологик параметрлари меъёр кўрсаткичларидан тушиши ва ускуналарнинг шикаштланишини олдини олиш мақсадида 1-сон БГҚ (360 МВт) ва икки дона энергоблоклар тўхтатилган.
Станцияда умумий электр энергияси ишлаб чиқарилиши мазут ёқилғиси ёқиш ҳисобига 500 МВт гача (белгиланган режага нисбатан 600 МВт кам) тушиб кетди. Электр энергияси балансини таъминлаш ва энергетика тизимида оғир оқибатли йирик фавқулодда авария ҳолатлари юзага келишининг олдини олиш мақсадида ҳамда туман электр таъминоти корхоналари томонидан 6,10 кВ тармоқлардан киритилаётган чекловлар самарасизлиги сабабли «Миллий диспетчерлик маркази» ДУК томонидан махсус жадвалга асосан юқори кучланишли тармоқлардан ўчирилиб, электр энергияси истеъмоли камайтирилди.Аввалроқ Энергетика вазирлиги электр ва газ таъминотидаги муаммоларни тўғри тушунишга чақиргани хабар қилинганди. Шунингдек, Ангрен ИЭС энергоблокида носозлик юзага келгани билдирилган.Юзага келган фавқулодда вазият сабаб тизимда оғир оқибатли авария ҳолатларини (блекаут) олдини олиш ҳамда истеъмолчилар таъминотида тартибсиз узилишларни бартараф этиш мақсадида сиздан 12 ноябрь санасидан бошлаб, алоҳида топшириқ бўлгунга қадар «Миллий диспетчерлик маркази» ДУК томонидан берилаётган соатлик электр энергияси истеъмоли топшириғини қатъий равишда бажаришингиз сўралади.
«Миллий диспетчерлик маркази»нинг минтақавий ва ҳудудий бўлинмалари томонидан электр талаб қилинган қийматларга тушириш бўйича берилган топшириқларни бажармаслик Ўзбекистон энерготизимининг айби билан Марказий Осиё ягона электр энергетикаси тизимида йирик оқибатли аварияларга сабаб бўлиши мумкин», – дейилади марказ директори хатида.
Изоҳ (0)