Қашқадарё вилоятининг Деҳқонобод туманида эллик нафар хотин-қизга субсидия асосида тикув машина, сув насос ва электр печ тарқатилди. Бу ҳақда «Дарё»га туман ҳокимлиги ахборот хизмати хабар берди.
Қабулда ҳудуддаги табиий газ, электр таъминотидаги камчиликлар ва сувсизлик муаммосидан ташқари, ишсизлик, айниқса хотин-қизларни иш билан банд қилишга урғу берилди. Туман ҳокимининг сайёр қабулида ҳоким ёрдамчиси ва маҳалла хотин-қизлар фаолининг тавсиясига кўра, 50 нафар «Аёллар дафтари»га киритилган ишсиз, эҳтиёжманд хотин-қизларга ўзларини банд қилиши учун субсидия тариқасида тикув машиналари, сув насоси ва электр печ тарқатилди, — дейди ҳокимлик ахборот хизмати масъули Муроджон Амиров.
Маҳаллада ҳоким ёрдамчиси сифатида ишлаб келаётган Бобомурод Абдиевнинг маълумот беришича, хотин-қизлар бандлигини таъминлаш учун қишлоқда кичик тикув корхоналари ҳам ташкил этилган.
Эндигина ишини бошлаган хотин-қизларга бепул, субсидия асосида тикув машиналари топширилиши айни муддао бўлди. Боиси, хотин-қизлар айнан менга ва хотин-қизлар фаолига шу масалада мурожаат қилиб, кўмак сўраганди. Таклиф ва президентимиз яратиб бераётган имконият билан уларнинг бу мурожаати ижобий ҳал этилди. Эндиликда қишлоқда юзлаб аёллар тикувчилик билан шуғулланиб, ўзини ўзи банд қилади, — дейди ҳоким ёрдамчиси Бобомурод Абдиев.
Изоҳ (0)