Сурхондарёнинг Шўрчи туманида мактаб болалари кўчада қолгани, хонадонлардан синфхона сифатида фойдаланилаётгани айтилмоқда

Сурхондарё вилоятининг Шўрчи туманида мактаб биноси Президент таълим муассасалари агентлиги тасарруфидаги ихтисослаштирилган мактабга айлантирилиши муносабати билан ёпилиб, мактаб ўқувчилари мактабсиз қолгани айтилмоқда. Бу ҳақда «Дарё»га хабар берган мурожаатчининг маълумот беришича, айни кунда ўқувчилар хонадонлардан мактаб сифатида фойдаланиб келмоқда.

Бу ҳолат бир ҳафтадан бери давом этмоқда. Вазият ҳақида Халқ таълими вазирлигига ҳам мурожаат қилдик. Муаммони айтдик, аммо улар бунга эътибор бермаяпти, — дейди мурожаатчи.

Бир ҳафтадан бери ўқувчилар одамларнинг уйида дарс ўтяпти. Лекин ҳамма ҳам ўқиёлмаяпти. Баъзи ўқувчилар бир ҳафтадан бери мактабга ҳам чиқмаяпти, — дейди мурожаатчи.

Аниқланишича, тумандаги 66-мактаб биноси Президент таълим муассасалари агентлиги тасарруфидаги ихтисослаштирилган мактабга айлантирилиши муносабати билан ёпилган ва ўқувчилар кўчада қолган.

Бу мактабимиз аввалроқ коллеж бўлган эди, коллежлар тугатилгач, мактабга берилганди. Энди болаларимиз яхши бинога ўтди дея хурсанд бўлгандик. Афсуски бу хурсандчилигимиз узоққа чўзилмади, — дейди у.