Гулруҳ Пирназарова бошловчи, театр, кино ва дубляж актрисаси сифатида ўзини кашф этишга интилаётган ёш истеъдод соҳибаларидан бири. У сериал ва фильмларда суратга тушиш билан бирга Ўзбек давлат драма театрида ҳам фаолият юритади. Кейинги пайтларда эса унинг ўқиган шеърлари ҳам ижтимоий тармоқларда машҳурликка эришмоқда. «Дарё» мухбири ёш актриса билан суҳбатда бўлиб, унинг ижоди ҳақидаги кўплаб саволларга жавоб олди.
«Танлов сабаб санъатга меҳр қўйганман»
— Қашқадарё вилоятининг Қарши шаҳрида туғилиб, ўша ерда мактабда ўқиб катта бўлганман. Еттинчи синфда ўқиётганимда «Баҳор маликаси» номли танлов ўтказилиши ҳақида айтишган. Танлов шартига кўра, унда қизлар қатнашиб, ғолиб бўлган иштирокчи «Баҳор маликаси» номини қўлга киритади, дейишган. Ўшанда мен ҳам синфимиз номидан қатнашганман ва математика, пазандачилик, касб-ҳунар, адабиёт ва саҳна кўриниши каби шартларни бажарганман. Афсуски, кўп шартлардан паст баҳо олганман. Лекин саҳна кўриниши шарти келганида, ўзим режиссёрлик қилиб, синфдошларим билан рол ижро қилганмиз. Ўша саҳна кўринишимиз энг юқори балл олиб, қолган баҳоларимнинг ўрнини тўлдириб, биринчиликни қўлга киритганман. Шу воқеадан кейин санъатга бўлган меҳрим кучайган. Менда «Бу ишни уддаладим, демак истеъдодли инсонман», деган ички интилиш пайдо бўлган. Биринчи бўлиб онамга актриса бўлиш ниятим борлигини айтганман.
«Дадам актриса бўлишимни истамаганди»
— Албатта, актриса бўламан, деган хоҳишим оила аъзоларимга, айниқса, дадамга умуман ёқмаган. Жиддий қаршиликлар бўлган. Дадам актриса эмас, бошловчи бўлишимни истарди. Ўзбекистон давлат санъат ва маданият олийгоҳига бюджет асосида қабул қилинганимдан сўнг шу йўналишда ўқишимга қарши бўлишмаган. Институтда ўқиётган кезларимда «Дадамнинг орзусини ушалтиришим керак», деб кўп хаёлдан ўтказардим. Одам нима ҳақида кўп ўйласа, ҳаётида ўша нарса содир бўлади, деб бежиз айтишмас экан. «Ҳинди Show»дан таклиф тушганда қувониб кетганман. Чунки бу кўрсатувда нафақат бошловчи, балки актриса ва раққоса сифатида ҳам иштирок этиш мумкин. Бундан ташқари, кўрсатувда эркинлик ва ранг-баранглик бор. Келаси кўрсатув қандай тартибда суратга олинишини олдиндан билмас эдик.
«Театрда Жулеттага айландим»
— Институтни тамомлаб, Ўзбекистон давлат драма театрига ишга кирганман. Ҳаётимдаги унутилмас роллардан бири Жулетта образини театр саҳнасида ижро этдим. Бунинг учун устозим Олимжон Салимовдан миннатдорман. Ана шу инсон сабаб мен Жулетта ролини ижро этолдим. У инсон биз ёшларга катта мактаб вазифасини ўтайди.Атроф муҳит жуда катта ўрин тутади. Мен ҳали ёш ижодкорман, кўпроқ тажрибали инсонлар билан ишлашни хоҳлайман. Чунки улардан билим, маҳорат ўрганаман. Ижодий жамоанинг рол ўйнашингизда ҳам таъсири катта бўлади. Театрдан айро ижод қилишни истамайман. Чунки у тинимсиз айланиб турадиган чархпалакка ўхшайди. Унда ишлаган ижодкор ҳамиша чархланиб бораверади.
«Илк ролим учун танбеҳ эшитганман»
— Илк ролимни Бекзод Ҳаққиевнинг «Нега сени севдим» номли клипида ижро этганман. У пайтда талаба эдим. Шунинг учун ҳам камера қаршисида ҳаяжонланганман. Съёмка Жиззахда бўлгани ва ролим массовка билан боғлиқ бўлгани учун ҳам қийналганман. Клип чиққанидан кейин хурсанд бўлиб устозим Замира Аҳмедовага кўрсатганимда «Ҳали камера билан ишлашга тайёр эмассан. Бу нимаси?» деб койиб берганди. Устозим қаттиққўл ва талабчан инсон. Ўша вақтда ундан бироз ранжигандим, аммо вақт ўтиб, клипни кўриб бу гаплар тўғри эканлигига такрор ва такрор амин бўламан.
«Китоб ёзишни истайман…»
— Актрисаликдан аввал менда китобга бўлган меҳр уйғонган. Болаликдан китоб ўқишни яхши кўрардим. Ҳатто 13 ёшимда ўзим ҳам ҳаётий роман ёзаман, деб ният қилганман. Насиб қилса, илк китобимни 30 ёшимда якунлаш ва чоп эттириш ниятим бор. Драматургияга ҳам қизиқаман, келажакда нафақат фильмларда суратга тушиш, уларнинг сценарийсини ёзишни ҳам истайман.
«Енгилтак қиз ролини ижро этишни истамайман»
— Енгилтак қизларнинг ролини ўйнашни истамайман. Насиб қилса, карьерамда бундай роллар умуман бўлмайди. Бундан ташқари, диний ва миллий қадриятларимизга қарши бўладиган ролларни таклиф этишса ҳам, умуман рози бўлмайман. Икки йил аввал таниш режиссёрлардан бири «Сизга зўр рол бор? Келинг, гаплашиб оламиз», деди. Хуллас у ролни тушунтириб бераётганда «Тахмина роли ҳақида гапирмаяпсизми?», деганман. Чунки «Дайди қизнинг дафтари» асарини 8-синфда ўқигандим. Асар жуда яхши ёзилган, бир инсоннинг тарбияланиши ҳаётий воқеалар билан очиб берилган. Аммо бу ролни ижро этишни истамасдим. Чунки уни отам, ака-укам ва яқинларим кўриши мумкин, деб уни рад этганман. Ҳар бир актрисанинг ўз чеклови бўлади. Мен ана шундай роллардан нари юришга ҳаракат қиламан. Баъзан шундай ролларга таклиф этишса «Наҳотки, мени шундай ролда кўролдингиз» деб режиссёрлардан ранжиган пайтларим ҳам бўлган.
«Кастингдан ўтолмадим…»
— «Муҳаббат баҳори» фильмида Зулфия ролини ижро этишни жуда истаганман. Чунки болаликдан шеър ўқишни яхши кўраман. Афсуски, кўринишим сабаб бу ролни ўйнаш насиб этмади. Рости, кастингдан ўтмаганимни эшитиб, бироз хафа бўлиб қолгандим. Аммо ниятим холис экан, дубляждаги устозим Комил Турсунбоев мени Зулфияхоним ролига овоз беришга таклиф этди. Хуллас, ролни бошқа актриса ижро этган бўлса ҳам унга овоз берганимдан ва шеърларини кадр ортида бўлса-да ўқиганимдан хурсандман.
«Саккиз фарзандим бўлишини орзу қиламан»
— Яқин келажакда меҳр-муҳаббатга тўла, кўп фарзандли оила бекаси бўлишни орзу қиламан. Камида саккизта фарзандим бўлишини истайман. Энг муҳими, турмуш ўртоғим Аллоҳни танийдиган, ибодатли инсон бўлса бўлди, қолган камчиликларини эса тўғирласа бўлади.
Эслатиб ўтамиз, Гулруҳ Пирназарова 1995 йилнинг 10 октябрида дунёга келган. У оилада уч фарзанднинг ўртанчаси бўлиб, акаси ва укаси бор. У Озод Шамснинг «Вой-дод» фильми ва «Изтироб» сериалларида суратга тушган.
Мавзуга доир:
- «Қодирхон» сериали актёри Даврон Асқаров санъаткорнинг қизига уйланаётгани, бўлажак рафиқаси ҳамда партнёрлари билан миш-мишлар ҳақида (видео)
- «Бадавлат инсоннинг қизи ёки ўйнаши эмасман». «Бахт овчиси» сериалидаги Зуля — Барчин Ғофурова билан интервью
- «Дайди қиз»даги Тахмина – Фотима Бердиева кинода бошқа суратга тушмаслиги ва чет эллик йигитга турмушга чиқаётгани ҳақида сўзлаб берди
- Муҳаммадали Алиев рафиқасининг қистови билан актёр бўлгани ҳамда онасининг ўлимидан сўнг ўзига кела олмаётгани ҳақида
- «Шукрона»даги Марям — Одина Тўхтасинова: Таржимондан актрисага айланган ҳамшира (фото)
Изоҳ (0)