Ўзбекистондан 9 ойда қанча фуқаро чет давлатларга манзилли ишларга жўнатилгани айтилди

Ўзбекистондан 2022 йил 9 ойи давомида Россия, Корея, Қозоғистон, Буюк Британия, Туркия, Германия, Япония каби давлатларга 27 мингдан ортиқ фуқаро манзилли ишларга жўнатилган. Бу ҳақда АОКАда Ташқи меҳнат миграцияси агентлиги ахборот хизмати раҳбари Ортиқхўжа Норов иштирокида ўтказилган брифингда маълум қилинди.

Агентлик томонидан жами 206 мингдан ортиқ фуқарога хизматлар кўрсатилган. Хусусан,

• 183 мингдан ортиғига — маслаҳат хизмати;
• 6063 нафарига — ҳуқуқий;
• 15 мингдан ортиғига — ижтимоий;
• 2595 нафарига — моддий ёрдам, шундан 1009 нафарига БҲМнинг икки бараваридан, жами 50 255 доллар миқдорида бир марталик моддий ёрдам кўрсатилган.

Шунингдек, 198 нафар фуқаро вақтинчалик хостелларга жойлаштирилган, оғир вазиятларга тушиб қолган 844 нафар фуқаро эса Ўзбекистонга олиб келинган. Агентликнинг хориждаги ваколатхоналари аралашуви билан фуқароларнинг иш берувчиларидан 834 минг доллар миқдоридаги иш ҳақлари ундириб берилган.