Прагадаги учрашувда Арманистон ва Озарбайжон бир-бирининг ҳудудий яхлитлигини ва суверенитетини тан олди. Бу ҳақда Елисей саройи матбуот хизмати хабар бермоқда.
Озарбайжон президенти Илҳом Алиев, Арманистон бош вазири Никол Пашинян, Франция президенти Эммануэль Макрон ва Евроиттифоқ кенгаши раиси Шарль Мишель кўп соатлар давом этган музокаралардан кейин якуний баёнот қабул қилди.
Озарбайжон ва Арманистон етакчилари Прагага Франция президенти ва Евроиттифоқ кенгаши раиси таклифи билан келди.
Улар БМТ уставига ва 1991 йилги Олмаота декларациясига содиқлигини тасдиқлади ҳамда уларга мувофиқ, бир-бирининг ҳудудий яхлитлиги ва суверенитетини тан олишини билдирди.
«Арманистон ва Озарбайжон, БМТ уставига ва 1991 йилги Олмаота декларациясига содиқлигини яна бир марта намойиш этган ҳолда, бир-бирининг ҳудудий яхлитлиги ва суверенитетини тан олади. Томонлар бу делимитация бўйича комиссия фаолияти учун асос бўлиб ҳисобланишини маълум қилди, комиссиянинг кейинги мажлиси октябрь охирида Брюсселда ўтказилиши керак», — дейилади тўрт томонлама учрашув якунида қабул қилинган баёнотда.
Арманистон Озарбайжон билан чегарага Евроиттифоқ фуқаролик миссиясини юборишга рози бўлди. Озарбайжон ҳам ушбу комиссия билан ҳамкорликка розилик берди. Миссия ўз ишини октябрда бошлаб, уни 2 ой давомида якунлайди.
Аввалроқ Озарбайжон президенти Илҳом Алиев йил охиригача Арманистон билан тинчлик шартномаси имзоланиши мумкинлигини, бу арман томонининг хоҳишига ҳам боғлиқлигини айтганди.
Арманистон ва Озарбайжон ўртасидаги зиддият
Ереван ва Баку ўртасида навбатдаги кескинлик 12 сентябрдан 13 сентябрга ўтар кечаси бошланди. Арманистон Озарбайжонни жануби-шарқий чегарани ўққа тутишда айблади. Ўз навбатида, Боку ҳам Арманистон томондан Озарбайжон армиясининг таъминот йўллари миналангани, шунингдек, ўт очилганини даъво қилди.13 сентябрь тонгида томонлар Москва воситачилигида ўт очишни тўхтатишга келишди, аммо отишмалар тўхтамади ва икки мамлакат ҳам бунда қарши тарафни айблади. 14 сентябрь оқшомида томонлар тинчлик бўйича яна бир бор келишувга эришди.
Арманистон КХШТдан ёрдам сўради, бироқ улар тинчликпарвар кучларни юборишдан бош тортди. КХШТ Арманистонга ўз миссиясини жўнатди, 19 сентябрь куни гуруҳ низони тинчлантириш учун таклифлар ишлаб чиққанини маълум қилди.
Изоҳ (0)