Россияда эълон қилинган сафарбарликка қарши 25—26 сентябрь кунлари Доғистонда бўлиб ўтган норозилик намойишлари Украина Қуролли кучларининг махсус операция кучлари бош разведка бошқармаси бўлинмаси раҳбарлигида тайёрланган, деди Доғистон раҳбари Сергей Меликов ўз видеомурожаатида.
«Бугунги кунда бизда ушбу тармоқлар УҚК махсус операцион кучлари бош разведка бошқармасининг мафкуравий ва психологик операциялар маркази томонидан бошқарилаётгани ҳақида маълумотлар бор. Албатта, тўғридан-тўғри ёки Киевдан туриб эмас», — деди у.
Ҳудуд раҳбарининг сўзларига кўра, норозилик ҳаракатига бошчилик қилган марказлар «Украина, Польша, Туркия, Грузия ҳудудида жойлашган». Аввалроқ Меликов намойишларни хориждан уюштирилган провокация деб атаганди.
Доғистонда сафарбарликка қарши акциялар ҳудуд пойтахти Махачқалъа, шунингдек, республиканинг иккинчи йирик шаҳри Хасавюртда бўлиб ўтди. ОАВ ёзишича, айрим намойишчилар ҳибсга олинган. Бундан ташқари, ижтимоий тармоқларда Эндирей қишлоғи аҳолиси норозилик билдириб, Хасавюрт—Махачқалъа автомобиль йўлини тўсиб қўйгани, полиция ҳавога ўқ узгани ҳақида хабарлар тарқалганди.
Изоҳ (0)