Иммунитет заифлашишига олиб келадиган овқатланиш билан боғлиқ одатлар

Куз ҳар доим шамоллаш фасли бўлган. Айниқса дунёда коронавирус пандемияси авж олган вақтда иммунитетни мустаҳкамлаш ҳақида жиддий ўйлаш бошланди. Бироқ организмга мутлақо тескари таъсир кўрсатадиган ва иммунитетни заифлаштирадиган бир қатор овқатланиш одатлари мавжуд. The Symbol нашри улардан энг кенг тарқалган бештаси ҳақда сўз юритди.

Кўп туз истеъмол қилиш

Организмдаги ортиқча натрий нафақат шиш, мушаклар кучсизлиги ва томир тортишишини келтириб чиқаради, балки иммунитетнинг заифлашишига ҳам олиб келиши мумкин. Тадқиқотга кўра, организм вирусли инфекцияларга қарши курашиши керак бўлган ресурсларнинг бир қисмини ортиқча тузни чиқариб ташлашга сарфлайди, бунинг натижасида иммуноглобулиннинг етарли миқдори ишлаб чиқарилмайди ва касал бўлиш хавфи ортади. Фастфуд, қайта ишланган гўшт маҳсулотлари, пишлоқларга чек қўйишга ҳаракат қилиш ва таом пиширишда туздан эҳтиёткорлик билан фойдаланиш тавсия этилади.

Кўп шакар истеъмол қилиш

Шакарни жуда кўп истеъмол қилишдан ижобий таъсир оладиган саломатлик жиҳатини топиш мумкин эмас. Шакар бўш углевод бўлиб, озуқавий қийматга эга эмас, аммо сурункали касалликлар хавфини оширади, қариш ва вазн ортишини рағбатлантиради, иммунитетни заифлаштиради. Глюкозанинг ортиши иммуноглобулиннинг фаоллигини ўртача 30 фоизга камайтиради, бу эса вирусли инфекциялар эҳтимолини сезиларли даражада оширади. Шакардан бутунлай воз кечиш шарт эмас, лекин унинг миқдорини қатъий назорат қилиш керак. Ширинликларни муқобилларга алмаштиришга ҳаракат қилиш мумкин, газли ичимликлар ўрнига кўпроқ сув ичиш тавсия этилади.

Клетчаткага бой маҳсулот истеъмол қилмаслик

Клетчатка соғлом ҳазм қилишни қўллаб-қувватлайди ва фойдали ичак бактерияларини ишлаб чиқаришни рағбатлантиради, бу нафақат иммунитет тизимини кучайтиради, балки терининг ҳолати ва кайфиятига ҳам фойдали таъсир кўрсатади. Клетчатка ва пробиотикларни кўп истеъмол қилиш иммунитетни сақлашга ёрдам беради, организмни вируслардан ҳимоя қилади. Рационга кўпроқ сабзавот ва дуккаклиларни киритиш тавсия этилади, улар клетчатканинг ҳақиқий омбори.

Жуда кўп қаҳва ичиш

Кофеин сеҳрли моддадир. У тетиклантиради, асаб тизимини рағбатлантиради, кўплаб сурункали касалликларнинг олдини олишга ёрдам беради ва эрта қариш белгилари билан курашади. Бироқ ҳамма нарса меъёрида яхши. Кўпинча ўта банд иш кунида тетик бўлиш учун кўп қаҳва ичилади ва бу иммунитетнинг заифлашишига, турли вирусли касалликларга олиб келиши мумкин. Бундан ташқари, кофеинга нисбатан тобелик ривожланиши мумкин, шунинг учун мутахассислар кунига 1-2 стакан қаҳва билан чекланишни маслаҳат беради. Агар етарлича қувват бўлмаса, уйқу режимини ўзгартиришга ҳаракат қилиш усулларидан фойдаланиш керак.

Сабзавотларни кўп истеъмол қилмаслик

Сабзавотлар нафақат юқорида айтиб ўтилган клетчатканинг ажойиб манбаи, балки витамин ва минералларнинг ҳақиқий омбори ҳамдир. А ва C витаминлари, фолий кислотасига бой яшил сабзавотлар иммунитет тизимини кўтариш учун ажойиб маҳсулот бўлиб, у шамоллаш мавсумдан соғлом ўтишга имкон беради. Шунинг учун тез-тез салат, сабзавотли шўрва ва смузиларни истеъмол қилиш тавсия этилади.