Олий суд Фарғонада фуқаро ИИБ ходимлари томонидан калтакланганига муносабат билдирди

Фарғона вилоятида икки нафар ИИБ ходими фуқарони аввалига бўғиб, сўнгра тепкилагани кўринган видео тарқалганди. Олий суд матбуот котиби ҳолат юзасидан муносабат билдирди.

Қайд этилишича, Фарғона шаҳридаги ҳолат юзасидан профилактика инспекторлари М.А. ва Б.Т. Жиноят кодексининг 206-моддаси (ҳокимият ёки мансаб ваколати доирасидан четга чиқиш) 1-қисмида назарда тутилган жиноятни содир этганликда айбли деб топилиб, жиноят ишлари бўйича Ёзёвон тумани судининг 2022 йил 14 мартдаги ҳукми билан ҳар иккисига нисбатан иш ҳақининг 30 фоизини давлат даромадига ушлаб қолган ҳолда 2 йил муддатга ахлоқ тузатиш ишлари жазоси тайинланган.

Мазкур жиноят иши вилоят судининг жиноят ишлари бўйича апелляция инстанциясида қайта кўриб чиқилиб, 2022 йил 23 августдаги чиқарилган ҳукмга кўра М.А. ва Б.Т.нинг хатти-ҳаракатларида жиноят аломатлари мавжуд эмаслиги сабабли айбсиз деб топилиб, уларнинг ҳар иккиси Жиноят-процессуал кодексининг 83-моддаси (реабилитация учун асослар) 2-бандига асосан реабилитация қилинган.

Фарғона вилояти прокурори томонидан Олий суднинг жиноят ишлари бўйича судлов ҳайъатига вилоят суди жиноят ишлари бўйича апелляция инстанциясининг 2022 йил 23 августдаги ҳукми устидан кассация тартибида протест келтирилган бўлиб, ушбу протест белгиланган тартибда кўриб чиқиш учун расмийлаштирилмоқда.

Ушбу жиноят иши Олий судда кассация тартибида кўрилиши бўйича суд жараёни якуни юзасидан батафсил ахборот берилади, — дейилади хабарда.

Ички ишлар вазирлиги ахборот хизмати раҳбари Шоҳрух Ғиёсовнинг маълумот беришича, воқеа юзасидан суд қарори чиққан ва унда ходимларнинг ҳаракатларида жиноят аломатлари йўқ деб топилган.

Олий Мажлис депутати Расул Кушербаев эса фуқарони аввалига бўғиб, сўнгра тепкилаган ИИБ ходимларига нисбатан оқлов ҳукмини чиқарган суд ҳақида фикр билдириб, «Яшасин одил суд» дея пост қолдирган.