Россиянинг Ижевск шаҳридаги мактабда отишма юз берди, қурбонлар бор

Ижевскдаги мактабда отишма содир этилди, дастлабки маълумотларга кўра, яраланганлар бор, деб хабар беради База Telegram-канали. Айни пайтда ўқувчилар ва ўқитувчилар эвакуация қилинмоқда. Сўнгги маълумотларга кўра, яраланган ўқувчилар сони бештага етган.

Воқеа Россия таркибидаги Удмуртия республикаси пойтахти Ижевск шаҳридаги 88-мактабда юз берган.

Ўқотар дастлаб қўриқчиларга қарата ўт очган, сўнг болаларни нишонга ола бошлаган.

Гувоҳларнинг айтишича, мактабда ўқ овозлари эшитилган, сўнг тинчиб қолган. Мактаб ўқувчилари орасида яраланганлар бор, уларнинг сони ҳозирча номаълум.

Отишма оқибатида икки нафар ўқувчи яраланган, қоровул ҳалок бўлган.

«112» канали маълумотларига кўра, дарс пайтида қора кийимдаги номаълум эркак синфга бостириб кириб, болаларга қарата ўқ уза бошлаган.

Мактаб директори яраланган ўқувчи билан бирга кабинетга кириб, яшириниб олишга улгурган.

Ижевск мактабида отишма содир этган ўқотар қўлга олинганича йўқ. Дастлабки маълумотларга кўра, мактабда ҳамон отишма овозлари эшитилишда давом этмоқда.

Мактаб биноси атрофига тез ёрдам, полиция ва қутқарувчилар машиналари тўпланган. Болаларнинг бир қисми эвакуация қилиниб бўлган.

Дастлабки маълумотларга кўра, Ижевскдаги мактабга ҳужум қилган шахс ўзини отиб ташлаган.

Россия мактабларида отишма уюштирилиши билан боғлиқ воқеаларнинг энг йирикларидан бири 2021 йилда Қозонда юз берганди.

2021 йил 11 майда 19 ёшли Илназ Галявиев ўзи битириб кетган 175-мактабга қонли ҳужум уюштирди. Йигит қурол олиб юриш рухсатномасига эга бўлган, мактаб ҳудудига ўқ-дорилар захираси билан кириб келган. Отишма оқибатида тўққиз нафар одам ҳалок бўлди, 23 киши жароҳатланди, яраланганларнинг аксар қисми болалар эди. Мактабга полициячилар етиб келганидан кейин Галявиев таслим бўлди ва уни ҳибсга олишди. Мерган қилган қонли жинояти учун қамалди.