Қозоғистон Украина вилоятларининг Россияга қўшилиши бўйича референдумларни тан олмаслигини маълум қилди
Қозоғистон Украинанинг тўрт вилояти — Донецк, Луганск, Херсон ва Запорожьенинг Россия таркибига қўшилиши бўйича ўтказилган референдумларни тан олмайди, деб хабар қилди Қозоғистон республикаси Ташқи ишлар вазирлиги матбуот хизмати.
«Ўзини ўзи республика деб эълон қилган Донецк ва Луганск халқ республикалари ҳамда Запорожье ва Херсон вилоятлари ҳарбий маъмуриятларининг Россияга қўшилиш бўйича референдум ўтказишига келсак, Қозоғистон давлатларнинг ҳудудий яхлитлиги, уларнинг суверен тенглиги ва тинч-тотув яшаши тамойилларидан келиб чиқади», — деди ТИВ матбуот котиби Айбек Смадияров ўз баёнотида.
Қозоғистон ТИВ вакили шунингдек, мамлакат президенти Қосим-Жўмарт Тўқаевнинг БМТ минбаридан сўзлаган нутқига эътибор қаратди — у ушбу жаҳон ташкилоти Низомига асосланадиган халқаро ҳуқуқ тамойилига собитқадамлик билан риоя қилиш муҳимлигини таъкидлаган эди. Низомда БМТга аъзо давлатларнинг тинчликни сақлаш ва давлатларнинг ҳудудий яхлитлигини ҳурмат қилиш масъулияти ҳақида сўз боради.
«Биз сиёсий мулоқотни йўлга қўйиш учун ҳар томонлама ёрдам беришга тайёрлигимизни яна бир бор тасдиқлаймиз», — деди Смадияров.
ДХР, ЛХР, Херсон ва Запорожье вилоятларининг Россияга қўшилиши бўйича референдумлар 23—27 сентябрь кунлари бўлиб ўтмоқда. Херсон вилоятидан ташқари, қолган уч ҳудуддаги овоз беришда аҳолининг ярмидан кўпи иштирок этган.
Россия президенти Владимир Путин Москва референдум натижаларини қўллаб-қувватлашини айтган. Шу билан бирга, қатор давлатлар, жумладан Сербия, Туркия ва G7 давлатлари уларни тан олишни истисно қилган. Август ойи бошида Украина президенти Владимир Зеленский референдум ўтказилса, Россия билан музокаралар тўхтатилишини айтганди. Украина ташқи ишлар вазири Дмитрий Кулеба референдумлар Киевнинг режаларини ўзгартирмаслигини қўшимча қилган.
«Украина ушбу ҳудудларни босиб олинган деб ҳисоблайди ва келажакда Россия нима дейишидан қатъи назар, уларни озод қилади», — деди у.
