Конституциявий қонун лойиҳаси 8 та миллий экспертизадан ўтказилди
10 сентябрь куни Конституцияга ўзгартишлар киритиш бўйича таклифларни шакллантириш ва ташкилий чора-тадбирларни амалга ошириш юзасидан Конституциявий комиссиянинг навбатдаги йиғилиши бўлиб ўтди. Бу ҳақда Қонунчилик палатаси хабар қилди.
Қайд этилишича, унда Комиссия аъзолари, Олий Мажлис Қонунчилик палатасининг масъул қўмиталари ҳамда оммавий ахборот воситалари вакиллари иштирок этган. Йиғилишда «Ўзбекистон Республикасининг Конституциясига ўзгартиш ва қўшимчалар киритиш тўғрисида»ги Конституциявий қонун лойиҳаси ҳамда уни такомиллаштириш бўйича амалга оширилган ишлар муҳокама қилинган.
Қайд этилишича, умумхалқ муҳокамаси жараёнга хориждаги ўзбекистонликлар ҳам бефарқ бўлмаган. Жумладан, Россия, Жанубий Корея, Туркия, Қозоғистон, Германия ва бошқа давлатлардан фуқароларнинг юзлаб таклиф ва муносабатлари келиб тушган.
Шунингдек, Қонунчилик палатасига ташриф буюрган ҳар бир хорижий делегация аъзолари билан Таклифлар билан ишлаш гуруҳи, Конституциявий комиссия матбуот хизмати ходимлари ўртасида суҳбатлар уюштирилган. Улар Ўзбекистон парламентининг қуйи палатасида яратилган шароитлар билан танишиб, конституциявий ислоҳот жараёнида қандай ишлар олиб борилаётганини амалда кўрган.
Худди шу тажриба ҳақида Женевадаги 30 дан ортиқ халқаро ташкилот вакиллари, Нью-Йоркда эса Бирлашган Миллатлар Ташкилоти бош қароргоҳида 40 дан зиёд давлатнинг доимий вакиллари ва бошқа халқаро ташкилотлар мутасадди раҳбарларига маълумот берилган. Шунингдек, бугунги кунга қадар Конституциявий қонун лойиҳаси мазмун-моҳиятини тушунтиришга бағишлаб халқаро ташкилотлар даражасида 11 та, хорижий давлатларда ҳам кўплаб тадбир ўтказилган.
Йиғилишда Конституциявий қонун лойиҳаси шу кунга қадар 8 та миллий экспертизадан ўтказилгани, шунингдек, Тошкентда БМТ, ЮНИСЕФ (БМТ Болалар фонди), ЕХҲТ (Европада хавфсизлик ва ҳамкорлик ташкилоти) каби ташкилотлар вакиллари билан 3 та халқаро жамоатчилик маслаҳатлашуви ташкил этилгани таъкидланган.
Бундан ташқари, Конституциявий қонун лойиҳасининг давлат тилидаги матни таҳририни тайёрлаш бўйича олиб борилган ишлар тўғрисида ҳам батафсил маълумот берилган.
Қайд этилишича, лойиҳада норматив-ҳуқуқий атамалар ўз мазмунига мувофиқ, ягона шаклда, тўғри қўлланилган. Адабий тил қоидалари ва нормалари талабларига ҳамда юридик, техник ва бошқа махсус қоидаларга аниқ риоя қилинган. Энг муҳими, лойиҳадаги нормалар содда ва равон акс эттирилган. Унинг сифати ва даражаси ҳозирги кундаги жаҳон конституциявий тараққиётининг тенденцияларига тўла мос келади.
Шу боис, қонун лойиҳасининг матни тайёр бўлиши билан у депутатлар муҳокамасига киритилади. Халқ вакилларининг фикрлари эътиборга олинган ҳолда кейинчалик тайёр бўладиган Конституциявий қонун лойиҳаси референдумга қўйилади. Конституциявий ислоҳот умумхалқ овоз бериш орқали амалга оширилиши Бош Қомуснинг аҳоли хоҳиш-иродасининг ифодаси – ҳақиқий халқ Конституцияси бўлишига хизмат қилади.
Йиғилиш якунида кун тартибидаги масалалар юзасидан хулосалар қилинган.
