ШҲТ Бош котиби Чжан Мин Хитойнинг CGTN халқаро янгиликлар телеканалига берган интервьюсида ШҲТга аъзо давлатларнинг Афғонистонни қўллаб-қувватлаш борасидаги саъй-ҳаракатлари ушбу мамлакатни тинч йўл билан қайта қуришга ҳисса қўшишига умид билдирди, деб хабар бермоқда «Дунё» АА.
Унинг таъкидлашича, Афғонистон масалалари бўйича ҳамкорлик ШҲТ мавжуд бўлган дастлабки кунлардан бошлабоқ ташкилот фаолиятининг асосий устувор йўналишларидан бири бўлиб келмоқда. Минтақада барқарорлик фақат Афғонистон масаласи ҳал қилинганидан кейингина бўлади.
«Шунинг учун ҳам бу давр оралиғида ШҲТ Афғонистон масаласига доимо катта эътибор, катта аҳамият қаратган, шунингдек, бу муаммони ҳал этиш учун турли воситачилик ҳаракатларни амалга оширган. Ўйлайманки, минтақадаги тинчлик, хавфсизлик ва барқарорлик кўп жиҳатдан ШҲТнинг мавжудлиги билан боғлиқдир. ШҲТга аъзо давлатлар Афғонистонни мустақил, тинч, бетараф ва демократик давлат сифатида тикланишига содиқлигини тасдиқламоқда», — деган Чжан Мин.
ШҲТ бош котибининг сўзларига кўра, Афғонистон афғон жамиятининг барча этник, диний ва сиёсий гуруҳлари вакиллари иштирокида инклюзив ҳукумат тузиш керак.
«Биз ҳам Афғонистон терроризм ва гиёҳвандликдан ҳоли тинч мамлакатга айланишини орзиқиб кутамиз. ШҲТ ушбу мақсадга эришиш учун барча саъй-ҳаракатларни амалга оширади. Ўйлайманки, мақсадимиз Афғонистонни тинч, хавфсиз ва ривожланаётган мамлакатга айлантириш», — деган Чжан Мин.
Изоҳ (0)