Фото: Футбол ва мини-футбол бўйича ДХХ кубогининг ғолиб ҳамда совриндорлари аниқланди
2022 йилнинг апрель ойида ёшлар ўртасида футбол ва мини-футбол бўйича уч босқичли ДХХ кубоги мусобақаларига старт берилган эди. Республика бўйича қарийб 242 минг нафар ёшларни қамраб олган мусобақаларнинг финал босқичи ўйинлари 22-27 август кунлари Тошкент шаҳрида бўлиб ўтди.
Унда мини-футбол бўйича ғолиблик Андижон вилояти Балиқчи туманидаги «Кўл» МФЙ ёшлари жамоасига насиб этган бўлса, Тошкент шаҳрининг Олмазор тумани «Пахта» МФЙ жамоаси иккинчи, Фарғона вилояти Фарғона тумани «Оқтепа» МФЙ жамоаси эса учинчи ўринни эгаллади. Навоий вилояти Хатирчи тумани «Жалоир» МФЙ жамоаси ярим финалга қадар муваффақиятли ўйин намойиш этиб, кучли тўртликни якунлаб берди.
Футбол бўйича ўтказилган беллашувларда эса Тошкент вилоятининг Бўка тумани «Дўстлик» МФЙ биринчи, Сирдарё вилояти Мирзаобод тумани «Боғистон» МФЙ жамоаси иккинчи ўринни эгаллади. Учинчи ва тўртинчи ўринлар Жиззах вилояти Жиззах шаҳар «Турон» МФЙ ҳамда Андижон вилояти Андижон тумани «Полосон» МФЙ ёшлари жамоаларига насиб этди. Финал ўйинида «Дўстлик» жамоаси «Боғистон» жамоасини 3:1 ҳисобида мағлуб қилди.
Мусобақалар якунига кўра мини-футбол бўйича:
«Энг яхши ўйинчи» Шаҳбоз Қувондиқов
«Энг яхши тўпурар» Баҳромбек Худаёров
«Энг яхши дарвозабон» Мадалиев Одилжон муносиб кўрилди.
Шунингдек, футбол бўйича:
«Энг яхши ўйинчи» Аҳрор Хўжабеков
«Энг яхши тўпурар» Асадбек Аҳмаджонов
«Энг яхши дарвозабон» Сирож Нормуродов муносиб кўрилди.
Эндиликда футбол ва мини-футбол бўйича биринчи ўринни эгаллаган жамоаларга улар истиқомат қиладиган маҳаллада мини-футбол майдончаси, иккинчи ўрин соҳибларига универсал спорт майдони (баскетбол ва волейбол ўйинлари учун мўлжалланган), учинчи ва тўртинчи ўринларни эгаллаган жамоалар маҳалласига эса «Стритбол» (бир саватли кўча баскетболи) спорт майдонлари қуриб берилади.
Республика босқичида ғолиб ва совриндор бўлган жамоаларнинг (1, 2, 3 ва 4-ўринлар) Ўзбекистон Ёшлар ишлари агентлиги кўмагида бир ҳафта мобайнида Тошкент вилояти Бўстонлиқ туманидаги Ўзбекистон Ёшлар иттифоқи марказий кенгаши таъсисчилигидаги «Шафран» тоғ-курорт комплексида дам олишлари ташкил этилади.
Бундан ташқари, ДХХ кубогининг вилоят босқичида ғолибликни қўлга киритган 28 та жамоа вакиллари истиқомат қиладиган маҳаллаларда «Workout» майдончалари барпо этилади.
