Шавкат Мирзиёевнинг таълим ва соғлиқни сақлашга масъул 65 ёшли маслаҳатчиси Абдужаббор Абдувоҳидов лавозимидан озод этилди. Ушбу маълумотни «Дарё» манбаси тасдиқлади.
Қайд этилишича, Президент администрацияси раҳбари Сардор Умрзоқов ўтказган йиғилишда аҳолининг жуда кўп эътирозлари айнан Абдувоҳидов масъул бўлган соҳаларга тўғри келиши айтилган.
Аввалроқ Абдужаббор Абдувоҳидов Халқаро кураш ассоциацияси (ИКА) вице-президенти этиб сайлангани ҳақида хабар берилган эди.
Абдужаббор Абдусаттарович Абдувоҳидов 1956 йил 16 декабрда туғилган. Ўзбек давлат арбоби, олим ва дипломат, тарих фанлари номзоди.
Абдувоҳидов 2002—2011 йилларда Тошкентдаги Вестминстер университети ректори лавозимида фаолият юритган. 2011—2012 йилларда Жаҳон иқтисодиёти ва дипломатия университети ректори бўлган. Сўнгра Президент ҳузуридаги Давлат бошқаруви академиясига ректорлик қилган.
2018 йил 27 августда Шавкат Мирзиёев фармони билан президентнинг ёшлар, фан, таълим, соғлиқни сақлаш ва спорт масалалари бўйича маслаҳатчиси этиб тайинланган.
Изоҳ (0)