Овқатдан заҳарланиш белгилари ва бундай ҳолатда уй шароитида биринчи ёрдамни қандай кўрсатиш ҳақида гастроэнтеролог Холида Халимова «Дарё»га ўз тавсияларини берди.
Шифокорнинг айтишича, ёз фаслида асосан тарвуз-қовун маҳсулотларидан заҳарланиш кўпроқ кузатилади.
«Одам бирор нарса истеъмол қилиб заҳарланганда овқатланишдан сўнг 3-4 соат ўтиб танада ҳолсизланиш рўй беради. Ҳарорат бироз кўтарилиши, кўнгил айниши ва қайт қилиши мумкин, 5-6 соатдан кейин ич кетиши бошланади.
Кўнгил айниши натижасида қайт қилиш кузатилганда, овқат ейишни тўхтатиш лозим. Иложи борича ҳеч нарса емаслик керак. Ҳарорат кўтарилганда эса кўпроқ сув ичиш тавсия этилади. Сув ичгандан кейин ҳам қайт қилиш тўхтамаса, шифокорга мурожаат қилинади.
Кунига 4-5 марта ич кетиб, қоринда кучли оғриқ пайдо бўлади. Ёш болаларда айниқса, бошини ёстиқдан кўтара олмай ухлаш кузатилади. Ўзбошимчалик билан даволашга ҳаракат қилмаслик лозим», — деди Холида Ҳалимова.
Гастроэнтеологнинг тавсия қилишича, овқатдан заҳарланганда уй шароитида беморнинг тана ҳарортаи 37-38 градусгача, шифокор кўригига қадар биринчи ёрдамни кўрсатиб туриш тавсия этилади.
«Бунда анор пўстлоғидан тайёрланган дамламани ичиш ёрдам беради. Дамламани тўғри тайёрлашга ҳам аҳамият қаратиш керак. Пўстлоқларни қайнатиб эмас, балки оддий чой каби дамлаб истеъмол қилиш лозим. Бу ич кетишни ва кўнгил айнишини тўхтатишга ёрда беради. Қайт қилиш тўхтамай, кўп такрорланаверса шифокор келгунга қадар беморга бир ампула «Новокаин»га бир қошиқ сув солиб ичирилса, қайт қилиш бирозга тўхтаб туради», — деди шифокор.
Аввалроқ гастроэнтеролог Холида Халимова полиз екинларидан заҳарланмаслик учун уларни истеъмол қилганда нималарга аҳамият бериш кераклиги ҳақида тушунтириш берганди.
Эслатиб ўтамиз, Наманган вилояти Норин туманида бир оила тарвуздан заҳарланди, уларнинг икки нафари вафот этгани ҳақида хабар берилганди. Оила деҳқон бозоридан тарвуз сотиб олган ҳамда икки кун музлаткичда сақлаб, истеъмол қилган тарвуз маҳсулотидан заҳарланган.
Изоҳ (0)