Тошкентнинг Юнусобод туманида ўта хавфли бўлган куйдирги касаллиги аниқлангани ҳақида хабарлар тарқалганди. Санитария-эпидемиология хизмати бу маълумотни рад этди.
Маълум қилинишича, пойтахтда 1—20 август кунлари «Куйдирги касаллигини табиий ўчоқларидан келиб чиқиши ва тарқалишини олдини олиш» мавзусида кўргазмали махсус-тактик ўқув машқи ўтказиш режалаштирилган. Ушбу буйруқнинг ижросини таъминлаш мақсадида 16 август куни СЕО ва ЖСХнинг Тошкент шаҳар бошқармаси ва туман бўлимлари, Тошкент шаҳар Фавқулодда вазиятлар бошқармаси, Тошкент шаҳар ССББ ва шаҳар ветеринария бошқармаси билан ҳамкорликда Учтепа туманининг 26-сонли оилавий поликлиника қошида Тошкент шаҳар ДПМлари тиббиёт ходимлари ва санитария эпидемиология хизмати мутахассисларини куйдирги касаллиги бўйича билим савияси ва амалий кўникмаларини ошириш мақсадида кўргазмали махсус тактик ўқув машқи ўтказилди.
Ушбу ўқув машқида 81 нафардан ортиқ соҳа мутахассислари қатнашди. Уларга куйдирги касаллигининг олдини олиш юзасидан эслатмалар тарқатилган.
2022 йил 18 август куни «Ёшлар» телеканалининг «Янги давр» информацион дастурида ҳам ушбу тактик-ўқув машқи юзасидан лавҳа намойиш этилган. Лавҳада соҳа мутахассиси томонидан берилган интервьюда куйдирги касаллигининг олдини олиш юзасидан чора-тадбирлари ва шаҳардаги эпидемик вазият юзасидан маълумот берилган.
Лавҳада эпидемиолог Лола Умарова 2021 йилда 30 нафар фуқарода куйдирги касаллиги гумон қилиниб, шулардан 10 нафарида касаллик тасдиқлангани, 2022 йил бошидан бери ҳозирги кунга қадар 10 кишида куйдирги касаллиги гумон қилиниб, бир нафари — Юнусобод туманида яшовчи фуқарода касаллик тасдиқланганини айтиб ўтган.
«Мазкур маълумот ўқув-тактик машғулот учун берилганлигини, жорий йилда Тошкент шаҳрида куйдирги касаллиги қайд этилмаганини маълум қиламиз», — дейилади Санитария-эпидемиология хизмати матбуот хизматининг ушбу маълумот юзасидан берган раддиясида.
Мавзуга доир:
Изоҳ (0)