Ҳатто Ҳиндистон ва Покистон ўртасидаги маҳаллий ядро уруши ҳолатида ҳам ўртача глобал калория истеъмоли беш йил ичида 7 фоизга камайиб кетади, энг катта кўламли сценарий — АҚШ ва Россия ўртасидаги тўлиқ кўламли ядровий тўқнашувда эса ушбу кўрсаткич уч-тўрт йилдан кейин тахминан 90 фоизга пасайиб кетади. Америкалик олимлар шундай хулосага келди. Тадқиқот натижалари Nature Food журналида эълон қилинди, деб ёзади «РБК».
Тадқиқотчилар фаразли ядровий низо ва унинг ҳар битта мамлакатда асосий қишлоқ хўжалик экинлари (маккажўхори, гуруч, баҳори буғдой ва соя) ҳосилига, шунингдек, чорвачилик ва балиқчиликка таъсири борасида бир нечта сценарийларни моделлаштирди.
Ўрта ва юқори кенгликлардаги мамлакатларда, шу жумладан, Россия ва АҚШ каби асосий экспортчи мамлакатларда ҳосилдорликнинг пасайиши энг жиддий бўлади, бу эса экспорт чекловларига олиб келиши ва импортга боғлиқ бўлган Африка ва Яқин Шарқ давлатларида жиддий узилишларни келтириб чиқариши мумкин. Австралия ва Янги Зеландия энг кам зарар кўради, аммо улар Осиё мамлакатлари ва бошқа давлатлардан қочқинлар оқимига дуч келиши мумкин.
Ядро уруши юз берган тақдирда бомбалар оловли бўронларни келтириб чиқариб, атмосферанинг юқори қатламларига катта миқдорда қурум отиб чиқарган бўларди, у эса бутун дунё бўйлаб тарқалиб, сайёрани тезда совитиб юборарди. Ҳосил бўлган қурумлар Ер иқлимини бузиб юборган бўларди. АҚШ, унинг иттифоқдошлари ва Россия ўртасида уруш юз берган тақдирда, 150 тераграммдан ортиқ қурум ҳосил бўлган бўларди, дейди олимлар.
БМТ Хавфсизлик кенгашининг доимий аъзолари — АҚШ, Россия, Франция, Буюк Британия ва Хитой ядро қуролига эга, аммо Ҳиндистон, Исроил, КХДР ва Покистон каби бошқа мамлакатлар ҳам уни қўлга киритган.
Аввалроқ БМТ бош котиби Антониу Гутерриш дунё «совуқ уруш авжига чиққан даврлардан буён мисли кўрилмаган ядровий хавф» билан юзлашганини айтганди. «Шу пайтгача бизнинг жудаям омадимиз келди. Бироқ омад — стратегия эмас. Ва ядровий зиддиятга айланиб бораётган геосиёсий кескинликдан ҳимоя ҳам эмас. Бугун инсоният ядровий йўқ қилинишдан бир қадам узоқликда турибди», — деди Гутерриш.
Россия президенти Владимир Путин, ўз навбатида, ядро урушида ғолиблар бўлмаслигини ва уни бошлаш керак эмаслигини таъкидлади. АҚШ давлат котиби Энтони Блинкен Вашингтон фақат фавқулодда ҳолатлардагина ядро қуролини қўллаши мумкинлигини айтди. «АҚШ фавқулодда ҳолатлардагина, ўзининг, иттифоқдошлари ва шерикларининг ҳаётий муҳим манфаатларини ҳимоя қилиш учун ядро қуролидан фойдаланиш имкониятини кўриб чиққан бўларди», — деди у.
Изоҳ (0)