Тайвань Хитой таклиф қилган «Бир мамлакат — икки тизим» моделини рад этди
Тайвань ҳукумати Пекин томонидан таклиф этилган «Бир мамлакат — икки тизим» модели доирасида Хитой билан бирлашиш имкониятини рад этмоқда, деб ёзади Meduza.
«Тайвань ‘бир мамлакат — икки тизим’ ғоясини қатъиян рад этади. Фақат Тайвань халқининг ўзи ўз келажаги ҳақида қарор чиқара олади», — деди Тайвань Ташқи ишлар вазирлиги вакили Жоанн Оу.
«Бир мамлакат — икки тизим» модели асосида Хитой таркибига кириш ҳақидаги, Тайванга қаратилган таклиф Давлат кенгаши томонидан 10 август куни эълон қилинган «оқ китоб»га* киритилган эди. У ерда Тайвань ва Хитойнинг «қайта бирлашуви» муқаррар экани ва Пекин масаланинг куч ишлатиладиган вариантини истисно қилмаётгани айтилганди.
*«Оқ китоб» — Хитой Давлат кенгаши томонидан чоп этиладиган даврий ахборот бюллетени. Унда муҳим масалалар бўйича ҳукумат позицияси баён қилинади.
Тайвань атрофидаги вазиятнинг кескинлашуви АҚШ Конгресси Вакиллар палатаси спикери Нэнси Пелосининг оролга ташрифи туфайли юз берди. Ушбу сафардан кейин Хитой Тайвань соҳиллари яқинида катта кўламли ҳарбий машғулотлар бошлади ва оролга қарши санкциялар эълон қилди.
«Бир мамлакат — икки тизим» модели 1997 йилда Хитой таркибига кирган Гонконгда амал қилади. Сўнгги йилларда Пекин Гонконг мухториятини сезиларли даражада чеклай бошлади, бу кенг кўламли норозилик намойишларига ва шаҳар мустақиллиги тарафдорлари ҳаракати юзага келишига сабаб бўлди.
