Европа Иттифоқи Россияга қарши санкцияларнинг 7-пакетини муҳокама қилмоқда
Европа Иттифоқи Россияга қарши санкцияларнинг еттинчи пакетини, хусусан, Шенген визаларини беришни тўхтатиш масаласини муҳокама қилмоқда. Бу ҳақда Германия ҳукумати матбуот котиби Штеффен Хебестрейт Берлиндаги брифингда айтиб ўтди.
Йиғилишда Германия канцлери Олаф Шольц Европа Иттифоқидаги айрим давлатларнинг русларга Шенген визаларини беришни тўхтатиш таклифига қандай муносабатда экани юзасидан савол йўлланган.
«Санкцияларнинг еттинчи пакети қандай бўлиши кераклиги ва таркибий қисмлари муҳокама қилинмоқда. Бунда сиз кўтарган саволлар муҳим рол ўйнайди. Бу масала бўйича федерал ҳукумат томонидан қандай муносабатда бўлиш кераклиги ҳақида ҳозирича ягона позиция йўқ», — деб жавоб қайтарган матбуот котиби.
Маълумот учун, Европа Иттифоқига аъзо мамлакатлар дарвозаси «калити» саналган Шенген визаси 90 кунгача 26 мамлакат бўйлаб эркин ҳаракатланиш ҳуқуқини беради.
Австрия, Бельгия, Венгрия, Германия, Греция, Дания, Исландия, Испания, Италия, Латвия, Литва, Люксембург, Лихтенштейн, Мальта, Нидерландия, Норвегия, Польша, Португалия, Словакия, Словения, Финландия, Франция, Чехия, Швейцария, Швеция ва Эстония давлатлари Шенген шартномасига аъзо давлатлар ҳисобланади.
