Ўзбекистондан Россияга юборилган қовунларда қовун пашшаси аниқланди
Охирги бир неча кун ичида Ўзбекистондан Россияга экспорт қилинган қовунларда икки марта қовун пашшаси топилган. Бу ҳақда Россиянинг Ветеринария ва фитосанитария назорати федерал хизмати («Росселхознадзор»)га таяниб, EastFruit хабар берди.
Улар Петрозаводскка юборилган қовунларининг учта партиясида ва Оренбургга жўнатилганларнинг бир партиясида аниқланган.
«Росселхознадзор»нинг Шимолий денгиз минтақалараро бошқармаси расмий баёнотига кўра, зарарланган маҳсулотлар эгалари уларни йўқ қилишга қарор қилган.
2022 йил 4 август куни Ўзбекистондан олиб келинган янги қовунларни энтомологик экспертизадан ўтказишда умумий ҳажми 19 426 тонна бўлган партиядан танлаб олинган қовунларда қовун пашшаси топилди, — деб хабар қилди «Росселхознадзор» матбуот хизмати.
Қовун пашшаси нима?
Қовун пашшаси — икки қанотли ҳашаротлар туркумига мансуб, қовоқдошларга мансуб ўсимликлар (қовун, тарвуз, бодринг, қовоқ кабилар)нинг хавфли зараркунандаси.
Бундай зараркунанда тарқалган ҳудудларда экинларнинг шикастланиш даражаси жуда юқори бўлади — ҳосилнинг йўқолиш эҳтимоли 20 фоиздан 100 гача.
Ҳаёт жараёнида ҳашаротлар пулпа ва уруғларга зарар етказади, бу шикастланган жойларда чиришнинг ривожланишига олиб келади, мева пулпаси эластиклигини йўқотади ва ёқимсиз ҳид чиқара бошлайди.
