Лондоннинг бир қатор душманлик ҳаракатлари туфайли Беларусь Буюк Британиядаги элчисини чақириб олди. Британия ҳукуматида «масъулиятли сиёсатчилар» пайдо бўлиши билан республиканинг тўлақонли дипломатик иштироки тикланади, дея маълум қилган Беларусь ташқи ишлар вазирлиги матбуот котиби Анатолий Глаз.
Бу қарор Беларусга қарши санкциялар жорий этилиши муносабати билан қабул қилинган. Глаз мамлакат иқтисодиёти ва молия тизимига нисбатан чеклов чоралари, «Belavia» авиакомпаниясининг парвозлари тақиқлангани ва Беларусь парламени аъзоларига ЕХҲТ Парламент Ассамблеясида иштирок этиш учун виза беришдан бош тортилганини эслатди.
Шу билан бирга, у элчининг чақириб олиниши икки давлат ўртасидаги дипломатик алоқаларнинг тўхтатилишини англатмаслигини, бироқ республиканинг тўлақонли дипломатик иштироки фақатгина Британия вазирлар маҳкамасида «масъулиятли сиёсатчилар» пайдо бўлиши билан тикланишини таъкидлади.
12 июль куни Беларусь президенти Александр Лукашенко республикага қарши кенг кўламли гибрид уруши бошланганини маълум қилганди. «Ушбу уруш Шимолий Атлантика альянсининг кибермаконда психологик операциялар ва қўпорувчилик ҳаракатларига ихтисослашган миллий ва коалиция тузилмаларини ўз ичига олади», — деди Лукашенко.
Изоҳ (0)