Ўзбекистон ҳукумати делегациясининг Ҳиндистонга ташрифи доирасида Деҳли шаҳрида инвестициялар ва ташқи савдо вазири Жамшид Хўжаев Ҳиндистон портлар, кемачилик ва сув йўллари вазири Сарбананд Соновал билан учрашди, деб хабар қилмоқда Дунё ахборот агентлиги.
Қайд этилишича, томонларнинг диққат марказида савдо ва инвестициявий ҳамкорлик масалалари бўлган. Ўзбекистон томонидан Тошкент—Сарахс—Чабаҳар—Нҳава Шева порти (Мумбай) йўналиши бўйича контейнерлардан иборат биринчи қатновни ташкил қилиш, лойиҳани муваффақиятли якунлагач эса бошқа асосий мақсадларга, шу жумладан, юқоридаги йўлакнинг рақобатбардошлигини оширишга қаратилган қулай шароитларни шакллантиришга киришиш таклиф этилган.
Ҳиндистон томони билан икки мамлакат ўртасида йўловчи қатновлари сонини ҳафтасига 4 дан 5 гача ошириш, шунингдек, ҳафтасига 2 марта ҳаво транспортида юк ташишни йўлга қўйиш масаласи келишиб олинган.
Учрашув якунида икки мамлакатнинг транспорт соҳасида муҳокама қилинган барча масалалар бўйича фаол ва доимий мулоқот қилишига содиқлик билдирилган.
Изоҳ (0)