Хоразм, Наманган ва Тошкент вилоятларида ўқишга киритиш ҳамда ўқишни кўчириб бериш билан боғлиқ фирибгарлик ҳолатлари фош этилди. Бу ҳақда Иқтисодий жиноятларга қарши курашиш департаменти хабар берди.
Маълум қилинишича, Бош прокуратура ҳузуридаги департамент ҳамда ДХХнинг Хоразм вилояти бошқармалари томонидан тезкор тадбир ўтказилган. Унда фуқаро Й.М. бошқа бир фуқаро Р.ни танишлари ёрдамида Тошкент давлат аграр университетига ўқишга киритиб қўйиш эвазига 4000 долларни олган вақтида ашёвий далиллар билан ушланган.
Шунингдек, Наманган вилояти бошқармаси томонидан ДХХ ходимлари билан ҳамкорликда ўтказилган тезкор тадбирда фуқаро Г.А. бошқа бир фуқаро Д.нинг қўшни Қирғизистон университетидаги ўқишини Наманган давлат университетига кўчириб бериш эвазига 3000 долларни олган вақтида ашёвий далиллар билан ушланган.
Департаментнинг Бекобод тумани бўлими томонидан ДХХ ходимлари билан ҳамкорликда ўтказилган тезкор тадбирда эса «I.К.» МЧЖ ходими А.А. фуқаро М.нинг қўшни Тожикистондаги ўқишини Низомий номидаги Тошкент давлат педагогика унверситетига кўчириб бериш эвазига 2200 доллар олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)