Xorazm, Namangan va Toshkent viloyatlarida o‘qishga kiritish hamda o‘qishni ko‘chirib berish bilan bog‘liq firibgarlik holatlari fosh etildi. Bu haqda Iqtisodiy jinoyatlarga qarshi kurashish departamenti xabar berdi.
Ma’lum qilinishicha, Bosh prokuratura huzuridagi departament hamda DXXning Xorazm viloyati boshqarmalari tomonidan tezkor tadbir o‘tkazilgan. Unda fuqaro Y.M. boshqa bir fuqaro R.ni tanishlari yordamida Toshkent davlat agrar universitetiga o‘qishga kiritib qo‘yish evaziga 4000 dollarni olgan vaqtida ashyoviy dalillar bilan ushlangan.
Shuningdek, Namangan viloyati boshqarmasi tomonidan DXX xodimlari bilan hamkorlikda o‘tkazilgan tezkor tadbirda fuqaro G.A. boshqa bir fuqaro D.ning qo‘shni Qirg‘iziston universitetidagi o‘qishini Namangan davlat universitetiga ko‘chirib berish evaziga 3000 dollarni olgan vaqtida ashyoviy dalillar bilan ushlangan.
Departamentning Bekobod tumani bo‘limi tomonidan DXX xodimlari bilan hamkorlikda o‘tkazilgan tezkor tadbirda esa “I.K.” MCHJ xodimi A.A. fuqaro M.ning qo‘shni Tojikistondagi o‘qishini Nizomiy nomidagi Toshkent davlat pedagogika unversitetiga ko‘chirib berish evaziga 2200 dollar olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)