Банкомати 3 фоиз комиссия олаётган банк қайси экани изланса-да топилмаган. Бу ҳақда 21 июль куни Тошкент шаҳрида бўлиб ўтган матбуот анжуманида Марказий банк раиси Мамаризо Нурмуродов маълум қилди.
Яқинда ижтимоий тармоқларда Ўзбекистондаги банклардан бирининг банкоматидан йирик миқдорда нақд пул ечиш учун 1,5 фоиздан 3 фоизгача комиссия ўрнатгани ҳақидаги хабар муҳокамаларга сабаб бўлганди. Ҳолат юзасидан Марказий банк муносабат билдирган. Анжуманда иштирок этган «Дарё» мухбирининг саволига жавобан, Марказий банк раҳбари ўша қайси банк экани қидирилгани, аммо топилмаганини билдирди.
«Ёрдамчиларимга қайси банкда 3 фоиз комиссия оляпти экан билинглар деб айтдим. Лекин биз бундай банкни топа олмадик. Менинг ўзимга ҳам у нима мантиқда 3 фоизлик комиссия олиш тартибни киритгани қизиқ эди. Мен бундан хурсанд бўлдим. Чунки у тизимга ўзининг янгича сиёсати билан ёндашяпти. Балки бу ҳеч кимга ёқмаслиги мумкин. Жуда кўп эътирозлар бўлди. Биз ҳам ўз фикримизни айтдик.
Кўп давлатларда банкоматлар комиссия фоизи олмайди деган гаплар бўлди. Банкоматдан даромадини олмаган тижорат банклари рақамли пластик карталар орқали кўрсатиладиган бошқа хизматлардан 2-3 баробар қилиб қоплаб олади. Бу бор нарса. Жуда кўпинглар чет элда бўлгансизлар. Visa катада пул олгансизлар. Ҳисоб-китоб қилгансизлар. Майли Ўзбекистоннинг картаси бўлмасин, хорижий банк картасида ҳам комиссия тўлови борку. Бизда ҳам банклар ўзининг картасидан комиссияни камроқ олиш ҳолатлари энди-энди пайдо бўляпти. Масалан, хусусий банкларимизда бу нарса секин-аста ривожланяпти. Банкоматлардан 1 фоизлик комиссия олиш чегараси ускуна, уни тўлдириш ва бошқа харажатлардан келиб чиқиб белгиланган», – деди Марказий банк расмийми.
Мамаризо Нурмуродовнинг қўшимча қилишича, бугунги кундаги асосий мақсад – нақд пулсиз ҳисоб-китоблар тизимини ривожлантиришдан иборат.
«Биз аҳолини нақд пулсиз ҳисоб-китоблар тизимини ривожлантириш стратегиясида, ўша карта чиқариш, банкомат тизимини ривожлантиришда олдимизга қўйган энг асосий мақсад, бу одамларни янги рақамлаштириш хизматларидан, банк хизматларидан фойдаланишига шароит яратишдир. Ҳозирги айтилаётган масала одамларнинг ойлигини картага тушириб, уни кейин банкомат орқали тарқатиш деган масалани олдимизга қўйганимиз йўқ. Энди бугунги кундаги вазият, у ерда жуда кўп тўғри хулосалар бўлди, қайсидир банкоматда пул йўқлиги, айрим қарашлар бўлди 200 минг сўмлик банкоматга пул етмагани учун чиқаряпти деган фикрлар ҳам бўлди. Майли, бу ҳар кимнинг фикри. Банкоматлардаги қай бир жойдаги узилишлар бу ҳудудий логистикани ташкил қилишда камчиликлар бўлиши мумкин», – деди у.
Аввалроқ Марказий банк раиси 200 000 сўмлик муддатидан олдин чиқарилиши сабабларини маълум қилганди.
Изоҳ (0)