Британия парламентининг Жамоатлар палатаси (қуйи палата) Борис Жонсон ҳукуматига ишончсизлик вотумини қўллаб-қувватлашдан бош тортди. Вотум учун 349 нафар депутат қарши, 238 нафари эса ёқлаб овоз берди, деб ёзади The Guardian.
Июнь ойида Британия парламентида шахсан бош вазирга нисбатан ишончсизлик вотумига овоз бериш бўлиб ўтган эди. У ҳам муваффақиятсиз тугаган, аммо июль ойи бошида Жонсон ҳукуматини 50 га яқин киши тарк этди ва бош вазир истеъфога чиқишга мажбур бўлди. У ўзи етакчилик қиладиган Консерватив партия ва ҳукуматга янги раҳбар сайланмагунча лавозимида қолади. Янги раҳбар сентябрь ойида сайланиши керак.
Reuters хабарига кўра, Жонсон ҳукуматига ишончсизлик вотуми бўйича овоз бериш учун ҳукуматнинг ўзи ташаббус кўрсатган. Бу Лейбористлар партияси ва бошқа мухолиф кучларнинг янги парламент сайловларини кутмасдан, ҳозироқ Жонсон ва унинг кабинетини истеъфога чиқаришга ундашларига жавоб бўлган.
Овоз бериш муваффақиятсиз якунланди, чунки Жамоатлар палатасида кўпчилик ўринларга эга бўлган Консерваторлар партияси ҳозир умумий сайлов ўтказишдан манфаатдор эмас – бунга хусусан, партияда етакчи йўқлиги сабаб бўлмоқда, деб ёзади The Independent.
Изоҳ (0)