18 июль куни кечқурун Парижнинг XI округидаги барда содир этилган отишмада бир киши ҳалок бўлди, яна тўрт киши яраланди. Бу ҳақда BFM TV полициядаги манбага таяниб, хабар берди.
Телеканал маълумотларига кўра, отишмани икки киши содир этган. Le Parisien газетасининг ёзишича, ҳужумчилар барга машинада келган ва терассада ўтирган меҳмонларга қарата ўқ узган. Улардан бири тўппонча, иккинчиси Калашников автомати билан қуролланган эди.
XI округ мери Француа Воглен ҳужумчилардан бири барга ташриф буюрувчилар томонидан ҳибсга олингани, иккинчиси эса қочиб кетганини ёзди. Le Parisien нашрининг ёзишича, қўлга олинган шахс вояга етмаган.
Айни пайтда полиция ҳужумнинг асосий версияси сифатида қасос олишни кўриб чиқмоқда. Ҳужумчиларнинг аниқ мақсадлари номаълум.
10 июль куни Жанубий Африка республикасидаги икки барда содир этилган отишмаларда 18 киши ҳалок бўлган эди.
Изоҳ (0)