Россия ҳукумати 2023 йилда миллий нефть стандартини яратишни муҳокама қилмоқда. Бу ҳақда Bloomberg хабар берди.
Октябрь ойидан миллий платформада нефть савдоси йўлга қўйилиши кутилмоқда.
Муҳокамалар Россиянинг асосий вазирликлари, нефть ишлаб чиқарувчилари ва Марказий банки томонидан олиб борилмоқда.
2023 йилнинг март—июль ойларида Россия эталон нархини белгилаш учун етарли савдо ҳажмига эришишда хорижий ҳамкорларни нефть сотиб олишга жалб қилиш устида иш олиб боради, — дейилади хабарда.
Режалар дастлабки босқичда. Агентлик маълумотларига кўра, бу Ғарб давлатларининг Россия нефть даромадларини чеклаш нияти билан боғлиқ.
Энди тижорат нефтининг асосий навлари Brent (Европа ва Осиё бозорлари), WTI (Америка) ва Dubai Crude (Осиё) ҳисобланади.
АҚШ, Канада, Буюк Британия аввалроқ Украинадаги урушга жавобан Россия нефтига эмбарго жорий қилган, Европа Иттифоқи эса яқин ойларда импортни тақиқламоқчи.
Ҳозир Ғарб давлатлари Россиянинг энергетика маҳсулотларини сотишдан тушадиган даромадини чеклаш мақсадида Россия нефтига нарх чегарасини жорий этиш имкониятини муҳокама қилмоқда.
Аввалроқ Германия 1 августда Россиядан кўмир, 31 декабрда нефть сотиб олишни тўхтатиши ҳақида хабар берилганди.
Изоҳ (0)