Европа 6 йил ичида биринчи марта Америка нефтининг энг йирик харидорига айланди

Европа Осиёни ортда қолдириб, Америка нефтининг энг йирик харидорига айланди, деб хабар бермоқда Bloomberg.

АҚШ Савдо вазирлиги маълумотларига кўра, январь—май ойларида Европа 213,1 млн баррель, Осиё 191,1 млн баррель нефть сотиб олган. 

Европа Россия энергетикасига қарамлигини камайтиришга ва АҚШ нефтига ўтишга ҳаракат қилар экан, савдо оқимларининг ҳозирги схемаси давом этиши мумкин, деди Energy Асpects нефть таҳлилчиси Кристофер Хейнс. 

Унинг сўзларига кўра, АҚШ ишлаб чиқариши ўсиб бормоқда, лекин Осиё ва Европа эҳтиёжларини қондира оладиган даражада тез эмас. 

Бундан ташқари, Яқин Шарқ ишлаб чиқариш ва Европага етказиб беришни кўпайтириш имконияти чекланган кўринади.

«Барча эътибор ОПЕК келгуси йилда ишлаб чиқариш қувватини ошира оладими ёки бозор улушини кўпайтира оладими, деган саволга қаратилади», — дейди таҳлилчи Элизабет Мерфи.

Лондоннинг ICE Futures биржасида Brent маркали нефтнинг сентябрь фьючерслари жума куни Тошкент вақти билан соат 12:35 га келиб 0,6 фоизга ошиб, бир баррель учун 99,71 долларни ташкил қилди. 

Нью-Йорк товар биржасининг (NYMEX) электрон савдоларида август ойидаги WTI нефти фьючерслари котировкалари 0,3 фоизга ошиб, бир баррели учун 96,04 долларни ташкил қилган.