Буюк Британия турар-жой қурилиши, жамоатчилик ва маҳаллий ўз-ўзини бошқариш вазири Майкл Гоув бош вазир Борис Жонсонга мурожаат қилиб, уни консерваторлар фикрига қулоқ солган ҳолда истеъфо беришга чақирганидан кейин у бош вазир томонидан ишдан бўшатилган. Бу ҳақда BBC Британия вазирлар маҳкамаси раҳбарининг Даунинг-стритдаги қароргоҳидаги манбасига таяниб хабар берди.
«Жамоада жиддий баҳсларда қўллаб-қувватламайдиган, кейин эса матбуотга етакчи кетиши кераклиги ҳақида қувонч билан хабар берадиган илон бўлиши керак эмас», — деди телеканал суҳбатдоши.
BBC маълумотларига кўра, Жонсон Гоувга қўнғироқ қилиб, унинг ишдан бўшатилганини айтган. Собиқ вазир Майкл Гоув бош вазирни истеъфо беришга кўндириш учун унинг қароргоҳига боргани ҳақида Sky News хабар берганди.
Гоув 2016 ва 2019 йилларда консерваторлар партияси етакчилиги учун Жонсонга қарши ўз номзодини қўйган бўлса-да, унинг азалий тарафдорларидан бири ҳисобланади. Вазир бўлишдан аввал у бош вазир канцелярияси раҳбари лавозимида ишлаган.
Аввалроқ Sky News бош вазирни аксарият консерваторларнинг фикрига қулоқ тутиб, истеъфога чиқишга даъват этганлар қаторида Буюк Британия ички ишлар вазири Прити Пател, Ғазначиликнинг янги канцлери Надим Захавий, Уэльс адлия вазири Саймон Харт ва транспорт вазири Грант Шаппс борлигини маълум қилганди.
Айни вақтда, рақамлаштириш, маданият, ОАВ ва спорт вазири Надин Доррис Жонсон тарафида қолишини айтган ва кўплаб ҳамкасблари уни қўллаб-қувватлаётганини таъкидлаганди.
BBC қайд этишича, Жонсоннинг ҳукуматида ўз лавозимини тарк этганлар сони сўнгги икки кун ичида 41 кишига етган.
Борис Жонсоннинг ўзи истеъфога чиқишдан бош тортиб, «курашни давом эттириши»ни айтган. «Борис Жонсон курашишда давом этмоқчи. У олға кетишда давом этиш учун атрофида етарлича одамлар бор деб ҳисоблайди», — деди Надин Доррис.
Июнь бошида Жамоатчилик палатасининг Консерватив партиядан чиққан аъзолари Борис Жонсоннинг партия етакчиси ва мамлакат бош вазири лавозимида фаолиятини давом эттириши бўйича овоз бериш ўтказди. Унинг натижаларига кўра, Жонсон лавозимини сақлаб қолди.
Жонсоннинг танқидчилари фикрича, коронавирус туфайли локдаунлар ва чекловлар авжига чиққан пайтда ҳукумат аъзолари томонидан уюштирилган зиёфатларни унинг истеъфога чиқиши учун сабаб қилиб келтирмоқда.
Ўтган ҳафта Консерватив партиянинг Жамоатчилик палатасидаги бош ташкилотчиси ўринбосари Крис Пинчер шилқимликлар туфайли истеъфо берган эди. Шундан кейин Жонсон Пинчер аввал ҳам шилқимликлар ҳақидаги парламент суриштируви иштирокчиси бўлганига қарамай, уни янги лавозимларга тайинлагани учун кечирим сўради.
Изоҳ (0)