2022 йил 1 июлда бўлиб ўтган Туркманистон Вазирлар маҳкамасининг йиғилишида транспорт ва коммуникациялар вазири Мамметхон Чакиев Болқон вилоятидаги Жебел қишлоғида қуриладиган Халқаро аэропорт ҳақидаги қарор тақдимотини ўтказди. Бу ҳақда «Хроника Туркменистана» хабар қилган.
Ҳужжатда Türkmenhowaýollary агентлиги Gündogdy корхонаси билан соатига 100 нафар йўловчига хизмат кўрсата оладиган Жебелдаги аэровокзал комплексини қуриш, шунингдек, ҳудудни ободонлаштириш ва аэропортга олиб борадиган йўлларни, коммуникация объектлар барпо этиш юзасидан лойиҳа шартномасини тузиш топшириғи берилган.
Сердар Бердимуҳамедов имзолаган қарорда қурилиш ишларини июлда бошлаш ва 2024 йилда тўлиқ битказган ҳолда фойдаланишга топшириш белгиланган.
Туркманистон Вазирлар маҳкамасининг 24 июнда бўлиб ўтган мажлисида иқтисодий масалалар бўйича бош вазир ўринбосари Муҳамметгули Муҳаммедов Жебелдаги халқаро аэропортни молиялаштириш ишлари ҳақида ахборот берган. Унинг сўзларига кўра, лойиҳани амалга ошириш учун кредитлар Абуд-Даби ривожланиш жамғармаси, Марказий Банк ҳамда Ташқи иқтисодиёт банки маблағлари жалб қилинади.
Шу билан бирга, собиқ президенти Гурбангули Бердимуҳамедов бир йил аввал Жебелга вертолётда келган ва шундан кейин аэропортни қуришга старт берилганди. Маросимда Сердар Бердимуҳамедов ҳам иштирок этган. Ўшанда Туркманистон давлат ахборот агентлиги янги аэропортнинг умумий майдони 275 гектар бўлиши, у ерда 200 нафар ходим ишлаши ҳақида ёзган. Учиш-қўниш чизиқларининг узунлиги 3200 метрга тенг бўлади.
«Уч йилдан кейин шу ерда замонавий аэропорт қад ростлаган бўлади», – деган объект пойдеворини қуйишни бошлаб берган Гурбангули Бердимуҳедов.
Аэропортни қуриш учун 75 миллион долларлик кредит Абу-Даби ривожланиш фондидан 9 июнда қабул қилиб олинган. Жамғарма билан кредит келишувини Ташқи иқтисодиёт банки имзолаган ва шартнома бўйича қарз 15 йил муддатга 3 йилга 4 фоизлик имтиёз билан тақдим этилган.
Изоҳ (0)