Беларусь президенти Александр Лукашенко мамлакатнинг Украинадаги урушда иштирок этишга интилмаётганини, мазкур уруш Минскга керак эмаслигини таъкидлади. Бу ҳақда Belta хабар қилган.
«Бизни ҳали ҳам урушга тортишга уриниш ҳолатлари кузатилмоқда. Бундан кўзланган мақсад бир зарбда Россия ҳамда Беларусь билан ҳисоб-китоб қилишдан иборат. Улар ҳодисадан хавотирга тушаётгандек таассурот қолдириб, Беларуснинг Украинага шимолий чегаралар орқали бостириб киришини истамсликлари ҳақида гапирмоқда. Менимча, уларни эшитмаслик керак! Улар биз урушга қўшилсак бундан хурсанд бўлишларига ишончим комил», – дея қайд этган у.
Лукашенконинг сўзларига кўра Украина томони Россия ва Беларусни фашистлар қилиб кўрсатишга интилмоқда.
«Яна бир марта бир йил ва ундан ҳам олдин гапирган гапимни такрорламоқчиман: Беларусь Украинада уруш олиб боришга интилаётгани йўқ», – деган Лукашенко.
Шунингдек, Беларусь президенти Украинадаги уруш туфайли бегуноҳ одамлар ҳалок бўлаётгани, минглаб кишилар ногиронга айланаётгани ҳақида ҳам гапирди.
«Бизга ушбу уруш умуман керак эмас», – дея қўшимча қилди у.
Эслатиб ўтамиз, аввалроқ Лукашенко Россияни ядро қуролини ишлатишга тайёр туришга чақирганди.
Шу билан бирга Александр Лукашенко ғарб давлатларининг Украина ҳудудига ўз қўшинини олиб кириши мумкинлиги, у ердан Беларусга ҳам ҳужум қилиш эҳтимоли мавжудлигини айтган.
Изоҳ (0)