Криптовалюта бозори «совуқ қиш»ни бошдан кечирмоқда – биткоин ва бошқа активлар нархи кескин тушиб, узоқ муддатли рекордларни янгилади.
Ўзбекистонда криптовалюталар билан боғлиқ вазият қандай? Улар билан нима қилса бўлади ёки аксинча – «Дарё» шарҳида.
Майнинг қилиш мумкин, лекин компанияларга
Май ойининг бошида Ўзбекистонда жисмоний шахсларга криптовалюта майнинги билан шуғулланиш тақиқланди.
Эндидан майнинг фақат компаниялар томонидан қуёш фотоэлектр станциялари орқали ишлаб чиқарилган электр энергиясидан фойдаланган ҳолда амалга оширилади.
Майнинг учун ягона электр энергетика тизимига уланган ҳолда электр энергиядан фойдаланган тақдирда:
- истеъмол қилинган электр энергияси учун тўловчилар белгиланган тарифга нисбатан 2 баробар ўсувчи коэффициентга мувофиқ тўланади;
- тиғиз даврда истеъмол қилинган электр энергия учун тегишли тарифлар Вазирлар Маҳкамаси томонидан белгиланадиган устамалар қўлланилади;
- истеъмол қилинган электр энергиясининг ҳисоби алоҳида ҳисоблагич ўрнатилган ҳолда юритилади.
Бу фаолият тури Истиқболли лойиҳалар миллий агентлиги (ILMA) томонидан мажбурий рўйхатдан ўтказилади ва лицензияланадиган фаолият турига кирмайди.
Майнинг билан шуғулланувчи шахслар (майнерлар) қонунчилик ҳужжатларида белгиланган тартибда рўйхатдан ўтишлари шарт.
Майнерларни рўйхатдан ўтказиш фақат интернет тармоғи орқали электрон шаклда амалга оширилади.
Сотиб олиш имконияти пайдо бўлди
2021 йил ноябрь ойида Ўзбекистон фуқароларига криптовалютани нафақат сотиш, балки сотиб олишга ҳам рухсат берилди.
Бундан кейин Uznex криптобиржасида сўмда ҳисобни тўлдириш ва ечиб олиш имконияти пайдо бўлди.
Uznex — Ўзбекистон ва Марказий Осиёдаги биринчи қонуний криптобиржа. У 2020 йилнинг январь ойида очилган.
ILMA’га кўра, криптобиржанинг очилиши янги IT ечимлар жорий қилинишидан ташқари, 1,5 миллион доллардан ортиқ тўғридан-тўғри хорижий инвестициялар жалб қилиниши ва 25 та янги иш ўринлари яратилишини таъминлаган.
Январь ойида биржада банк ҳисоби орқали функционаллик мавжуд эди. Кейинчалик Uzcard ва Humo орқали ҳам ҳисобни тўлдириш ва ечиб олиш имконияти йўлга қўйилиши кутилган эди.
Лекин июнь ойида криптобиржада сўм орқали ҳар қандай фаолият тури вақтинчалик тўхтатилгангани ҳақида маълумот бор.
Uznex менежерининг «Дарё»га маълум қилишича сўмдаги фаолият июль ойида қайта тикланиши кутилмоқда.
Унинг сўзларига кўра, яқинда Uzcard ва Humo орқали ҳисобни тўлдириш ёки уни ечиб олиш ҳам мумкин бўлади.
Пул воситаси сифатида ишлатиш мумкин эмас
Ўзбекистонда криптовалюталар билан тўловларни амалга ошириш қонуний равишда тақиқланган.
«Криптоактивлардан Ўзбекистон Республикаси ҳудудида тўлов ёки тўлов воситаси сифатида фойдаланиш мумкин эмас», — дейилади ILMA директорининг буйруғида.
Марказий банк вакилларига кўра, биткоин ва бошқа криптовалюталар Ўзбекистонда ҳали бери тўлов воситаси сифатида фойдаланилмайди. Сабаб — криптовалюта ҳеч нарса билан кафолатланмаган.
Изоҳ (0)