Шольц, Макрон ва Драги ёпиқ учрашувда Зеленскийни Путин билан музокараларни қайта бошлашга чақирган — Die Welt

16 июнь куни Киевга ташриф буюрган Евроиттифоқ мамлакатлари етакчилари — Франция президенти Эммануэль Макрон, Германия канцлери Олаф Шольц ва Италия бош вазири Марио Драги Украинага Евроиттифоқ аъзолигига номзод мақоми берилишини ёқлаб чиқди, деб ёзади «Коммерсантъ». Бироқ, Die Welt хабарига кўра, бунинг эвазига улар «ёпиқ эшиклар ортида» Украина президенти Владимир Зеленскийни Россия президенти Владимир Путин билан музокаралар ўтказишга чақирган.

«Улар мамлакатларига уруш туфайли етаётган иқтисодий зарар тобора кўпайиб бормоқда, унинг ўрнини тўлдириш эса қийинлашиб кетмоқда. Иқтисодий ўсиш кескин секинлашди, инфляция эса рекорд даражага етди», — дея нашр Евроиттифоқ мамлакатлари етакчиларининг позициясига аниқлик киритди.

Die Welt қайд этишича, «учлик кечиккан», у Франция, Германия ва Италия етакчилари Украинага, хусусан, Буюк Британия бош вазири Борис Жонсон ва Еврокомиссия раҳбари Урсула фон дер Ляйеннинг ташрифидан кейин етиб келганини назарда тутди. Бироқ улар бу ташрифни биргаликда амалга оширгани «кечикиш»ни қоплаб кетади, чунки бу уларнинг бирдамлигини намойиш этди, дейилади хабарда.

Франция, Германия ва Италия етакчиларидан ташқари, Киевга Руминия президенти Клаус Йоханнес ҳам келди. Музокаралар якунлари бўйича матбуот анжуманида Эммануэль Макрон тўртала Европа етакчиси ҳам Украинага «зудлик билан» номзод мақомини бериш ғоясини қўллаб-қувватлаганини айтди. Олаф Шольц Украинага аъзолик тақдим этилиши учун «демократия ва қонун устуворлиги бўйича талаблар бажарилиши керак», деди.

Шунингдек, Макрон таъкидлашича, Франция ва Германия Украина томонидан ён беришлар ҳақида Россия билан музокаралар ўтказмайди. Унинг фикрича, Киев музокараларни қачон ва қандай шароитларда қайта бошлашни ўзи ҳал қилиши керак.

Нашр эслатишича, Россия ва Украина делегациялари ўртасидаги сўнгги юзма-юз учрашув 29 март куни Истанбулда бўлиб ўтган, шундан кейин музокаралар тўхтаб қолган эди.