15 июнь куни бошланган Петербург халқаро иқтисодий форумида бирорта ҳам ғарблик жиддий инвестор қатнашмайди, форум сайтида эълон қилинган дастур шундан дарак бермоқда, деб ёзади Deutsche Welle. Россиялик миллиардерлардан эса тадбирда атиги олти киши иштирок этади.
Дастурга кўра, форумда ҳаммаси бўлиб 11 нафар Ғарб спикерлари ва олти нафар россиялик миллиардерлар чиқиш қилади. Франция, Италия, Канада ва Америка савдо палаталари вакилларидан иборат беш иштирокчи «Ғарб инвесторлари: янги реалиялар» мунозарасида нутқ сўзлайди.
Яна икки нафар хорижлик спикер спорт ва унга нисбатан санкцияларнинг таъсирига бағишланган дискуссияда қатнашади. Россиядаги Европа бизнеси уюшмаси раҳбари Тадзио Шиллинг санкциялар шароитида бюджет ва солиқ сиёсати ҳақида гапиради. Урбанизация ҳақидаги мунозараларда италиялик бизнесмен Фабио Каччатори қатнашади.
Бундан ташқари, ўзини ўзи таъминловчи иқтисодиёт ҳақидаги баҳс-мунозараларда франциялик иқтисодиётчи Жак Сапир иштирок этади.
Россиянинг энг йирик иқтисодий форумида бу йил бор-йўғи олти нафар россиялик миллиардер қатнашади. 2021 йил ҳолатига Россияда бойлиги 1 миллиард доллардан ошадиган 120 дан зиёд бизнесмен борлиги маълум қилинган эди. Форумдаги дикуссияларда «Северсталь» эгаси Алексей Мордашов, «Новатэк» раҳбари Леонид Михелсон, «Ренова» гуруҳи директорлар кенгаши раиси Виктор Вексельберг, «ТМК» собиқ раҳбари Дмитрий Пумпянский, «Касперский лабораторияси» асосчиси Евгений Касперский ва ЧТПЗ собиқ раҳбари Андрей Комаров иштирок этади.
Ўтган ҳафта АҚШ Давлат департаменти Петербург халқаро иқтисодий форумида Америка вакиллари қатнашмаслигини эълон қилиб, бошқа мамлакатлар компаниялари ва ҳукуматларини ҳам бойкотга қўшилишга чақирганди. «Россия кучлари Украинага ҳужум қилаётган бир пайтда ‘бизнес одатдагидек бўлмаслиги’ ҳақида очиқ-ойдин сигнал юборишга чақирамиз », — деган эди Давлат департаменти матбуот котиби Нед Прайс.
Изоҳ (0)