Самарқандда 4 000 доллар эвазига ўқишга киритишни ваъда қилган Самарқанд давлат университети ўқитувчиси қўлга олинди. Бу ҳақида «Дарё»га вилоят ИИБ ахборот хизмати маълум қилди.
Таъкидланишича, 2022 йилнинг 9 июнь куни ҳуқуқни муҳофаза қилувчи органларга фуқаро ариза билан мурожаат қилган. Унда фарзандини олий ўқув юртига ўқишга кириши учун ҳужжат топшириш тартиби билан танишиб юрган вақтида, Самарқанд давлат университети ўқитувчиси Ж.Ш. билан танишиб қолганлигини, Ж.Ш. унинг ишончига кириб, 4 000 доллар эвазига фарзандини университетнинг Иқтисодиёт факультетига ўқишга жойлаштириб қўйишини айтган. Ж.Ш. олдиндан 2 500 долларни талаб қилиб келаётганлигини маълум қилиб, унга нисбатан қонуний чора кўришни сўраган.
Мазкур аризага асосан, шу куни Самарқанд вилояти ИИБ Жиноят қидирув бўлими Коррупция ва иқтисодий жиноятларга қарши курашиш бўлими ва ДХХ Самарқанд вилояти бошқармаси ходимлари ҳамкорлигида тезкор тадбир ўтказилиб, Ж.Ш. ариза муаллифидан талаб қилган 4 000 доллардан 2 500 доллар миқдоридаги пулларни олган вақтида ашёвий далиллар билан қўлга олинган.
Ҳозирда мазкур ҳолат юзасидан жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
«Самарқанд вилояти ИИБ фуқаролардан ўқишга киритиб қўйишни ваъда қилган фирибгарлардан огоҳ бўлишни, уларнинг ёлғонларига ишонмасликни сўраб қолади», – дейди вилоят ИИБ ахборот хизмати раҳбари Жаҳонгир Сагдуллаев.
Мавзуга доир:
- Фарғонада Тошкент тиббиёт академиясига ўқишга киритиб қўйиш учун 10 минг доллар олган шахс ушланди
- Олий таълим вазири ўқишни кўчириш борасида нотўғри талқин қилинаётган фикрларга муносабат билдирди
- Андижон ва Бухорода фуқароларни ноқонуний йўл билан иш ва ўқишга киритиб қўймоқчи бўлган шахслар ушланди
Изоҳ (0)