Samarqandda 4 000 dollar evaziga o‘qishga kiritishni va’da qilgan Samarqand davlat universiteti o‘qituvchisi qo‘lga olindi. Bu haqida “Daryo”ga viloyat IIB axborot xizmati ma’lum qildi.
Ta’kidlanishicha, 2022-yilning 9-iyun kuni huquqni muhofaza qiluvchi organlarga fuqaro ariza bilan murojaat qilgan. Unda farzandini oliy o‘quv yurtiga o‘qishga kirishi uchun hujjat topshirish tartibi bilan tanishib yurgan vaqtida, Samarqand davlat universiteti o‘qituvchisi J.SH. bilan tanishib qolganligini, J.SH. uning ishonchiga kirib, 4 000 dollar evaziga farzandini universitetning Iqtisodiyot fakultetiga o‘qishga joylashtirib qo‘yishini aytgan. J.SH. oldindan 2 500 dollarni talab qilib kelayotganligini ma’lum qilib, unga nisbatan qonuniy chora ko‘rishni so‘ragan.
Mazkur arizaga asosan, shu kuni Samarqand viloyati IIB Jinoyat qidiruv bo‘limi Korrupsiya va iqtisodiy jinoyatlarga qarshi kurashish bo‘limi va DXX Samarqand viloyati boshqarmasi xodimlari hamkorligida tezkor tadbir o‘tkazilib, J.SH. ariza muallifidan talab qilgan 4 000 dollardan 2 500 dollar miqdoridagi pullarni olgan vaqtida ashyoviy dalillar bilan qo‘lga olingan.
Hozirda mazkur holat yuzasidan jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.
“Samarqand viloyati IIB fuqarolardan o‘qishga kiritib qo‘yishni va’da qilgan firibgarlardan ogoh bo‘lishni, ularning yolg‘onlariga ishonmaslikni so‘rab qoladi”, – deydi viloyat IIB axborot xizmati rahbari Jahongir Sagdullayev.
Mavzuga doir:
- Farg‘onada Toshkent tibbiyot akademiyasiga o‘qishga kiritib qo‘yish uchun 10 ming dollar olgan shaxs ushlandi
- Oliy ta’lim vaziri o‘qishni ko‘chirish borasida noto‘g‘ri talqin qilinayotgan fikrlarga munosabat bildirdi
- Andijon va Buxoroda fuqarolarni noqonuniy yo‘l bilan ish va o‘qishga kiritib qo‘ymoqchi bo‘lgan shaxslar ushlandi
Izoh (0)