Инсон териси организмнинг ички жараёнларига кўзгу тутади. Агар унинг сигналлари тўғри талқин қилинса, касаллик дастлабки босқичларидаёқ аниқланиб, соғлиқдаги муаммоларнинг олдини олиш мумкин, деб ёзади Marie Claire.
Инсон териси ҳимоя функциясини бажаради ва зарарли моддаларнинг организмга киришига тўсқинлик қилади. Шу билан бирга, терининг ҳолати одамда ҳар доим нотўғри парвариш қилиш билан боғлиқ бўлмаган бир қатор муаммолар борлигини кўрсатиши мумкин.
Юз ва танадаги тошмалар
Тошмалар пайдо бўлишининг ҳақиқий сабабини кўпинча ўзгарувчан гормонлардан излаш керак. Масалан, тестостерон гормонининг кўпайиши билан тери ёғланиши ва йирингли тошмалар пайдо бўлиши мумкин. Сероз таркибли пушти тошмалар унинг юзасида яшовчи бактерияларнинг чиқинди маҳсулотларига реакцияси туфайли пайдо бўлади. Ёш билан боғлиқ ҳолатларда ҳам юзда кўплаб яллиғланиш элементлари патоген микроорганизмларнинг мавжудлигини кўрсатади. Шунингдек, овқат ҳазм қилиш тизимидаги бузилишлар, масалан, тез-тез ич қотиши ҳам юзда ҳуснбузар пайдо бўлишига олиб келиши мумкин.
Қуруқ тери
Ушбу аломат ирсий мойилликка боғлиқ бўлиши мумкин ёки атроф-муҳит омиллари билан кучаяди. Қуёшли ва совуқ об-ҳаво терини ҳаддан ташқари қуритиб, уни кўчишига олиб келиши мумкин. Бу ҳолат кун давомида тез-тез ҳарорат ўзгаради, иситиш тизимларининг ҳаракати билан кучаяди.
Шунингдек, терининг ҳолатига кўпинча ёмон одатлар (чекиш, спиртли ичимликлар) ва кун давомида етарли миқдорда сув истеъмол қилмаслик билан таъсир қилади. Витамин ва ёғларнинг етишмаслиги билан нотўғри овқатланиш тери қуришининг пайдо бўлишига таъсир қилувчи муҳим омиллардан биридир. Аслида, қуруқлик эпидермиснинг стрессга ўзига хос реакциясидир. Тери кўчиши эса қалқонсимон бездаги носозликни ҳам кўрсатиши мумкин.
Терининг қичишиши ва қизариши
Бу тананинг ўзи ёки терининг парваришлаш маҳсулотларига аллергик реакциясини кўрсатади. Шу билан бирга, ичаклар билан боғлиқ муаммоларда ҳам ушбу ҳолат кузатилади.
Шиш
Бу аломат кўпинча уйқу режимини мунтазам равишда бузадиган, кечаси шўр ёки аччиқ овқат истеъмол қилишни яхши кўрадиганлар, шунингдек, кун давомида оддий сув ичишни эътиборсиз қолдирадиганларда пайдо бўлади. Қолаверса, юрак-қон томир тизими, буйрак касалликлари, эндокрин касалликлар билан боғлиқ муаммолар юзнинг шишишига олиб келади.
Ёғли тери
Ёғли тери ҳам ирсий мойиллик ёки индивидуал хусусият бўлиши мумкин. Ҳар доим нормал ёки аралаш типда бўлган тери бирдан ёғли бўлиб қолса, эҳтиёт бўлиш керак. Бундай вақтда гормонал фонда ўзгаришлар юз берган бўлиши мумкин.
Купероз
Одатда, бу танадаги қон томир касалликларини кўрсатади. Юздаги капиллярларнинг пайдо бўлишининг яна бир сабаби — жигар касаллиги. Асосий сабаб режимга риоя қилмаслик, тоза ҳавода юришни эътиборсиз қолдириш, чарчоқ, стресс. Юқоридагиларга қўшимча равишда авитаминоз, анемия ва ошқозон-ичак трактидаги муаммолар ҳам киради.
Терининг гиперпигментацияси
Кўпинча, бу ҳодиса қуёшда жуда кўп вақт қолиш ёки терининг юқори қатламига зарар етказадиган муайян турдаги процедуралардан сўнг косметологнинг кўрсатмаларига риоя қилмасликдан келиб чиқиши мумкин. Қолаверса, гиперпигментация мутахассиснинг тажрибасизлиги ҳамда ранг, тур, мавсумий омилга мувофиқ тартибларни нотўғри танлаганлиги сабабли пайдо бўлади. Гормонал бузилишлар ҳам терининг гиперпигментациясининг яна бир кенг тарқалган сабабидир. Хусусан, бу тухумдонлар ва буйрак усти безлари фаолиятидаги муаммолар билан боғлиқ.
Изоҳ (0)