Ўзбекистонда теле ва радио дастурларни қайта узатиш хизматлари бозоридаги рақобат қонунчилиги талабларини бузган яна бир монопол ташкилотга иш қўзғатилди, деб хабар беради Монополияга қарши курашиш қўмитаси.
Маълум қилинишича, «Ўзбекистон кабель телевидениеси» МЧЖ томонидан кўрсатиладиган хизматлар нархлари республикада IP-телевидение фаолияти билан шуғулланувчи тадбиркорлик субъектларининг норозилигига сабаб бўлган. Монополияга қарши курашиш қўмитасининг махсус комиссияси томонидан мазкур ҳолат ўрганиб чиқилган.
«Ўзбекистон кабель телевидениеси» МЧЖ хорижий телеканалларнинг теледастурлар пакетини шакллантириш ва уларни Ўзбекистон ҳудудида кабель ва IP-телевидение фаолияти билан шуғулланувчи хўжалик юритувчи субъектларга тарқатиш хизмати бўйича Товар ёки молия бозорида устун мавқейини эгаллаб турган хўжалик юритувчи субъектларнинг давлат реестрига киритилган.
Махсус комиссия томонидан мурожаатда қайд этилган ҳолатлар ўрганиб чиқилиб, бозорда устун мавқейига эга корхона — «Ўзбекистон кабель телевидениеси» МЧЖга нисбатан иш қўзғатилган ҳамда жамият томонидан адолатсиз нарх қўлланилгани ва рақобат қонунчилиги талаблари бузилгани ҳолатларини бартараф этиш бўйича қарор ва кўрсатма берилган. Натижада нархларни сунъий ошириш ҳолатига чек қўйилган ва тадбиркорлик субъектларининг қонуний манфаатлари ҳимоя қилинган.
Шунингдек, қўзғатилган иш якуни бўйича, Махсус комиссия томонидан «Ўзбекистон кабель телевидениеси» МЧЖга хизматлар нархларини тартибга солиш органида тасдиқлаш (декларация қилиш) ҳамда келгусида ишларни қонунчилик талаблари доирасида давом эттириш юзасидан тегишли кўрсатма берилган.
Аввалроқ монопол корхоналарнинг 3,6 миллиард сўмдан ортиқ асоссиз даромади истеъмолчилар фойдасига қайта ҳисоб қилингани тўғрисида хабар берилганди.
Изоҳ (0)