«Челси»нинг янги хўжайинлари ёзда трансферлар учун 200 млн фунт ажратишга тайёр

«Челси» бош мураббийи Томас Тухель ёзги трансферлар вақтида 200 миллион фунт харажат қилиши мумкин.

Тодд Боули консорсиуми Лондон клубини харид қилгач, трансферлар учун шунча пул ажратмоқчи.

«Челси»нинг асосий мақсади ҳимоя чизиғини кучайтириш. Ёзда жамоани Антонио Рюдигер, Андреас Кристенсен ва катта эҳтимол билан Цезарь Аспиликуэта ҳам тарк этади.

«Аристократлар» Жюл Кунде («Севилья») ва Ёшка Гвардиол («Лейпциг») вариантларини кўриб чиқмоқда. Лондонликларнинг рўйхатида 8 ҳимоячи, жумладан, Пау Торрес («Вильярреал») ва Хосе Хименес («Атлетико») ўрин олган.

Шунингдек, «Челси» Орельен Тчуаменига ҳам қизиқиш билдирди. Аммо «Монако» ярим ҳимоячиси «Реал»га ўтишни хоҳламоқда. «Вест Ҳэм» эса ўз футболчиси Деклан Райсни 150 миллион фунтга баҳоламоқда.

Тимо Вернер, Ҳаким Зиёш ёки Кристиан Пулишич сотиб юборилса, «кўклар» 2023 йилда эркин агентга айланадиган Раҳим Стерлинг («Манчестер Сити») трансферини кўриб чиқади.

«Челси» ҳужумчиси Ромелу Лукакунинг келажаги эса ҳозирча номаълум бўлиб қолмоқда.