«ПСЖ» Килиан Мбаппега ўринбосар футболчилар топди. Лионель Месси ва Неймар Парижда қолади

«ПСЖ» ёзда Роберт Левандовски ёки Муҳаммад Салоҳни харид қилади.

ESPN нашрининг хабарига кўра, Килиан Мбаппе Париж клубини тарк этса, раҳбарият ёзда «Бавария»ни тарк этадиган Роберт Левандовски ёки «Ливерпуль» билан янги шартнома борасида келиша олмаётган Муҳаммад Салоҳга эътибор қаратади.

Лионель Месси ва Неймар «ПСЖ» сафида қолади. Клубдагилар аргентиналик ҳужумчининг «ПСЖ»даги иккинчи мавсуми биринчисига қараганда ёрқинроқ бўлишига ишонмоқда. Неймар «ПСЖ» раҳбариятининг ҳафсаласини пир қилган, жамоа унга келиб тушган таклифларни кўриб чиқишга тайёр. Аммо таклифлар парижликларнинг талабларини қондира оладиган даражада катта бўлиши даргумон. Шунинг учун бразилияликнинг клубда қолиш эҳтимоли юқори.

Аввалроқ, Мбаппенинг «Реал»га ўтишга рози бўлса йилига 50 миллион евролик маошга эга 5 йилга мўлжалланган шартнома ва 100 миллион евро бонусга эга бўлиши ҳақида маълумот берилганди. «ПСЖ» футболчини ўз сафида олиб қолиш учун ҳаракат қилмоқда. Футболчи эса ҳозирча якуний қарор қабул қилгани йўқ.

Роберт Левандовски 2021/22 йилги мавсум «Бавария» сафида Бундеслигада 33 та ўйинда майдонга тушиб, 34 та гол ва 4 та голли узатмага муаллифлик қилди.

Муҳаммад Салоҳ эса «Ливерпуль» сафида АПЛда 34 та ўйинда майдонга тушиб, 22 та гол ва 14 та голли узатмагани ўз ҳисобига ёздириб қўйди.