Англия Премьер Лигаси 2021/22 йилги мавсумнинг энг яхши мураббийи номига номзодлар рўйхатини эълон қилди.
Унга кўра якуний рўйхатдан 5 нафар мутахассис ўрин олди. Булар: Пеп Гвардиола («Манчестер Сити»), Томас Франк («Брентфорд»), Эдди Ҳау («Ньюкасл»), Юрген Клопп («Ливерпуль») ва Патрик Виейра («Кристал Пэлас»).
Гвардиола беш мавсумда тўртинчи бор Англия чемпионлигини қўлга киритишни мақсад қилган. Мавсум якунланишига 2 тур қолганда «шаҳарликлар» 89 очко билан энг яқин таъқибчисидан 3 очко ўзиб кетган. Гвардиола шогирдларини чемпионликдан 4 очко ажратиб турибди.
Томас Франк эса АПЛдаги дебют мавсумида жамоани 13-поғонага қадар олиб чиқди. Агар стабилликни ушлаб қолса, шу жойида ёки ундан ҳам юқорироқда жойлашиши мумкин. Ундан ташқари Франк жамоаси ушбу мавсумда «Челси», «Вест Ҳэм» ва «Арсенал»ни мағлуб эта олди.
«Ньюкасл» 2021/22 йилги мавсумнинг дастлабки 14 турида бирорта ғалаба қозона олмади. Ҳау 2021 йил ноябрь ойида жамоани қабул қилиб олди. «Ньюкасл» ўшанда 5 очкога эга эди. Шу вақтга қадар Эдди қўл остида жамоа 43 очко жамғарди ва 14-ўринга қадар кўтарилди.
Клопп иккинчи марта чемпионликни нишонлаш учун кураш олиб бормоқда. Ҳозирда «Манчестер Сити»дан 3 очко ортда.
Премьер Лига бош мураббийи сифатида ўзининг илк мавсумида Виейра «Кристал Пэлас» билан 11-поғонагача кўтарилди.
АПЛда мавсумнинг энг яхши мураббийи бўлиш учун номзодларнинг кўрсаткичлари:
1. Пеп Гвардиола — 36 ўйинда 28 та ғалаба, 5 та дуранг, АПЛда ҳозирда 1-ўрин;
2. Томас Франк — 36 ўйинда 12 та ғалаба, 7 та дуранг, АПЛда 13-ўрин;
3. Эдди Ҳау — 25 ўйинда 11 та ғалаба, 5 та дуранг, АПЛда 14-ўрин;
4. Юрген Клопп — 36 ўйинда 26 та ғалаба, 8 та дуранг, АПЛда 2-ўрин;
5. Патрик Виейра — 35 та ўйинда 10 та ғалаба, 14 та дуранг, АПЛда 11-ўрин.
Изоҳ (0)