Жиззахда 21 ёшли йигитни аёллар билан юришини ота-онасига айтиш билан қўрқитиб, ундан 3 млн сўм талаб қилган шахслар ушланди

Жиззах вилоятида товламачилик йўли билан пул ундирмоқчи бўлган шахслар қўлга олинди, дея хабар қилмоқда Тергов департаменти.

Қайд этилишича, 2022 йилнинг 28 апрель куни 21 ёшли Ю.Ж. вилоят ички ишлар бўлимига ариза билан мурожаат қилиб, унда олдиндан таниш бўлган 25 ёшли Р.М. ҳайдовчилик гувоҳномаси ўғирланмаган бўлса-да, «Ҳайдовчилик гувоҳномамни шерикларинг ўғирлаб олган», деб айтиб, гўёки уни ўғирлангани бўйича ИИБга ариза билан мурожаат қилган.

Шу орқали ота-онасини ички ишлар идорасига чақиртириб, уларни олдида шармандасини чиқаришни, енгил табиатли аёллар билан боғлиқ муносабатлари, уларга пул сарфлаётганлиги тўғрисида ота-онасига хабар қилишини рўкач қилиб, Ю.Ж. учун сир сақланиши лозим бўлган шахсий маълумотларни ошкор қилиш билан уни қўрқитган.

Ундан товламачилик йўли билан 3 млн сўм миқдоридаги пулларни беришга мажбур қилаётгани учун унга нисбатан қонуний чора кўришни сўраган.

Мазкур ариза юзасидан ўтказилган тезкор тадбир давомида юқоридаги шахс Жиззах шаҳар «Сайилжойи» маҳалласи ҳудудида жойлашган Simple кафеси яқинида аризачидан талаб қилинган пулларни олган вақтда ашёвий далиллар билан қўлга олинган.

Мазкур ҳолат юзасидан Жиззах шаҳар ИИБ ҳузуридаги тергов бўлими томонидан Р.М.га нисбатан Жиноят кодекснинг 165-моддаси 1-қисми (товламачилик) билан жиноят иши қўзғатилган.

Ҳозирда жиноят иши юзасидан дастлабки тергов ҳаракатлари олиб борилмоқда.

Жиноят кодексининг нормаларига кўра, ушбу турдаги жиноятни содир этган шахс 3 йилдан 5 йилгача озодликни чеклаш ёхуд 3 йилдан 5 йилгача озодликдан маҳрум қилиш билан жазоланиши мумкин.