Бухоро вилоятининг Қоракўл туманида яшовчи аёл чақалоғининг оғзига латта тиқиб ўлдирди. Аёлга нисбатан жиноят иши қўзғатилган. Бу ҳақда «Дарё»га вилоят прокуратураси матбуот хизмати раҳбари Анвар Эсанов хабар берди.
Таъкидланишича, 1995 йил Қоракўл туманида туғилган Р.Н. 2022 йилнинг 9 май куни Бухоро шаҳрида яшовчи аммасининг хонадонига меҳмон бўлиб борган. Уй эгалари байрам муносабати билан яқин қариндошининг уйига кетганда, аёл уйда ёлғиз қолган.«Шу куни, тахминан, соат 13:00 да аёлни тўлғоқ тутиб, орадан чамаси бир соатлар ўтиб, у хонадоннинг ювиниш хонасида ўғил фарзандини дунёга келтирган. Она боласи никоҳсиз ва яширин равишда туғилгани учун чақалоқнинг оғзига латта тиқиб, унинг ўша ондаёқ вафот этишига сабабчи бўлган. Орадан кўп ўтмай уй эгалари келиб қолган ва зудлик билан ички ишлар идораларига хабар берган», — дейди «Дарё» мухбири билан суҳбатлашган масъул.
Вилоят прокуратураси тезкор ходимлари томонидан олиб борилган суриштирув ҳаракатларига кўра, аёлнинг ҳомиладорлигидан унинг аммаси бехабар бўлган.
Аниқланишича, Р.Н. турмуш ўртоғидан қонуний ажрашган бўлиб, турмушидан бир нафар фарзанди бор. У бир йил илгари наманганлик фуқаро Ш.Т.билан танишган ва у билан яширин равишда ишқий муносабатда бўлиб келган. Натижада ҳомиладор бўлиб, ўғил фарзандни дунёга келтирган. Яқинларидан айбини яшириш мақсадида ўзи дунёга келтирган фарзандининг қотилига айланган.
Аёлга нисбатан Жиноят кодексининг 99-моддаси 1-қисми (онанинг ўз фарзандини қасддан ўлдириши) билан жиноят иши қўзғатилиб, аёл қўлга олинган. Ҳолат юзасидан дастлабки тергов ҳаракатлари олиб борилмоқда.
Изоҳ (0)