Ойналарнинг туси ўзгартирилган, яъни қорайтирилган автомобиллар ўзининг орқасидан келаётган машиналар ҳайдовчиларига олдиндаги ҳаракатни кўришга халақит бериши мумкин. Бу ҳақда «Маҳалла» телеканалининг «Минбар» кўрсатувида Орифжон Назаров исмли автомактаб ўқитувчиси фикр билдириб ўтди.
«Ойналарни қорайтиришнинг қулайлиги бор — қуёш нуридан тўсади, салонни совутиш тизимига ҳам бироз ёрдам беради. Лекин бунинг ноқулайлиги ҳам бор, ҳайдовчи сифатида бир оқимда кетяпсиз, олдингизда эса ойналари қорайтирилган автомобиль кетяпти. Шунда сиз олдиндаги хавфни кўра оладиган даражада тайёр бўлишингиз керак. Яъни унинг олдида пиёда чиқиб қолиш эҳтимоли борми, у қаерда тормоз олади — шунга қараб сиз оралиқ масофани сақлаб юрасиз. Илгари ойналар қорайтирилмаганда, ўша автомобилнинг ичидан ҳайдовчи ҳозир қаерда тормоз олишини тахмин қиларди…», — дейди у.
Шунингдек, мутахассис ўзининг хавфсизлигини ойнаси қорайтирилган автомобиль ҳайдовчисига ишониб топшира олмаслигини таъкидлаган.
«Кейин оддий ҳайдовчи сифатида битта нарсадан ўйланиб қоламан. Дейлик, ойналари қоп-қора автомобиль ичида ўтирибсиз. Биз кичкина болаларни боғчага, мактабга олиб борамиз. Шу бола қоп-қора машинанинг ичида ўтирса, унинг руҳиятига қанақадир таъсири бўладими? Мисол учун, бола атрофни бор рангларда кўргани маъқулмикан ёки қорайтирилган автомобиль ичидан кўргани маъқулмикан?
Эслатиб ўтамиз, Ўзбекистонда 2021 йил 1 сентябрдан ҳайдовчилардан транспорт бошқариш учун ишончнома ва «тонировка» рухсатномасини талаб этиш тартиби бекор қилинган.
Изоҳ (0)