Қашқадарё вилоятининг Шаҳрисабз туманида марҳум спортчи, 2012 йилда ўтказилган самбо бўйича ўсмирлар ўртасидаги жаҳон чемпионати ғолиби Камолиддин Расулов хотирасига бағишланган турнир бўлиб ўтди. Бу ҳақда «Дарё»га марҳумнинг яқинлари хабар берди.
Маълум бўлишича, хотира турнири 2022 йилнинг 9 май кунлари Шаҳрисабз туманидаги Болалар ва ўсмирлар спорт мактабида бўлиб ўтган бўлиб, унда Сурхондарё, Бухоро, Самарқанд ва Тошкент шаҳридан келган 200 нафар полвон иштирок этган.
«Қашқадарё вилояти ҳокимлиги, вилоят спортни ривожлантириш бошқармаси, вилоят Кураш федерацияси ҳамкорлигида ўтказилган хотира турнирида нафақат қашқадарёлик полвонлар, республикамизнинг кўплаб ҳудудларидан келган полвонлар иштирок этди ва ўзаро беллашди», — дейди «Дарё»га ахборот берган марҳумнинг турмуш ўртоғи.
Қўшимча қилинишича, 3 та вазн тоифасида ғолиб бўлган полвонларга эсдалик совғалари ва Камолиддин Расулов расми туширилган махсус медаллар топширилган.
Эслатиб ўтамиз, самбо бўйича жаҳон чемпиони 29 ёшли Камолиддин Расулов 2021 йилнинг 13 сентябрь куни соат 21:30 да Тошкент шаҳрининг Учтепа туманидаги кўп қаватли уйлар олдида бошқа бир спортчи томонидан пичоқлаб ўлдирилганди. Бош прокуратура ахборот хизматининг расмий маълумотида чемпион йигитнинг пичоқланишига унинг гумонланувчи танишига «Ҳумo Троп» витаминини тавсия қилгани, оқибатда эса гумонланувчининг соғлиғи ёмонлашгани, шифокорлар бу касалликнинг давоси йўқлигини билдиргани хабар берилганди. Жиноят ишлари бўйича Учтепа туман суди мазкур қотиллик воқеасини 2022 йилнинг 8 февраль кунидан бошлаб кўра бошлади. Мазкур судда сўз олган Шуҳрат Тўрабоев марҳум Камолиддин Расулов тавсия қилган витаминни айтилган миқдордан кўра кўпроқ истеъмол қилгани сабаб соғлиғи ёмонлашганини, кечалари иссиғи чиқиб, ухлолмайдиган бўлиб қолганини айтди. Марҳумнинг хотини Гулноза Холмуродова эса қотиллик унинг кўз ўнгида содир бўлганини, қотиллик содир бўлган пайтда ҳаммадан ёрдам сўраб, чақирганини аммо ҳеч ким, ҳатто ППХ ходимлари ҳам унга ёрдам бермаганини айтганди. Судда сўз олган яна бир гувоҳ А.Қ. «Ҳумo Троп» витамини ҳақида гап очиб, таниши Шуҳрат Тўрабоевнинг соғлиғи шу витамин сабаб ёмонлашганини билдирди. ППХ ходимлари эса воқеа жойига етиб борганида Шуҳрат Тўрабоев улардан қочиб, кўп қаватли уй подъездига яширинганини маълум қилганди.
Марҳум спортчи Камолиддин Расуловнинг қотилига дастлаб 15 йил муддатга озодликдан маҳрум қилиш жазоси тайинланганди. Кейинчалик жазо бекор қилиниб, қотил 19 йилга озодликдан маҳрум қилинди.
Мавзуга доир:
- «Суддан норозимиз». Марҳум Камолиддин Расуловнинг опаси укасининг қотили етарлича жазоланмаганини айтмоқда
- Прокурор марҳум спортчи Камолиддин Расулов ўлимида айбланаётган шахсни 20 йилга озодликдан маҳрум қилишни сўради
- «Даҳшатли қотиллик кўз ўнгимда икки киши томонидан содир этилди. Аммо иккинчи шахс судда кўринмаяпти». Марҳум спортчи Камолиддин Расуловнинг хотини қотиллик воқеаси ҳақида
- «Аввалига қочди, кейин ўзи таслим бўлди». Марҳум спортчи Камолиддин Расулов ўлими билан боғлиқ воқеани ўрганаётган судда ИИБ ходимлари кўрсатма берди
- Чемпион йигит Камолиддин Расулов ўлимида айбланаётган шахс курашчи Шерали Жўраев билан ҳам адоватда бўлган
- «Ҳар куни ўлиб-тирилгандан кўра ўша куни бир марта ўлишга рози эдим» — пичоқлаб ўлдирилган спортчи Камолиддин Расуловнинг беваси
- «Камолиддин сотган витаминдан сўнг ўртоғимнинг юраги секин ураётгани, жигари катталашгани айтилганди». Марҳум спортчи ўлими юзасидан бўлиб ўтаётган судда дори воқеаси эсга олинди
- «Кимдир ёрдам берармикан, деб йиғлаб ёрдамга чақирдим. Аммо ҳеч ким келмади, ҳатто ППХ ходимлари ҳам қараб туришганди». Тошкентда ўлдирилган спортчининг беваси судда воқеа қандай бўлганини айтиб берди
Изоҳ (0)